İstifadə müddəti ötmüş ərzaq malları satışdan çıxarılıb - SİYAHI

İndiyədək 242 min manat cərimə tətbiq olunub

İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti ölkə ərazisində istehlakçı hüquqlarının qorunması, həmçinin istifadəyə yararsız istehlak mallarının satışının qarşısının alınması istiqamətində nəzarət tədbirlərini davam etdirir.

Bu barədə Lent.az-a nazirliyin mətbuat xidmətindən bildirilib. Dövlət Xidmətinin keçirdiyi növbəti monitorinqlər zamanı Bakının Xətai rayonunda yerləşən “İnci market”də, “VİP market”də, “Riyad Market”də, “Azles” MMC-yə məxsus “Savalan market”də, “Endi Market”də, “Azər market”də və Xaçmaz rayonunun Nabran qəsəbəsində yerləşən “Qafqaz” pərakəndə ticarət mağazasında ümumi çəkisi 200 kiloqrama yaxın saxlama müddəti ötmüş ərzaq məhsulları - kolbasa və qənnadı məmulatları, kərə yağları, süd və süd məhsulları, sərinləşdirici içkilər, ketçuplar, mayonezlər və s., həmçinin kosmetik vasitələr aşkar olunub, satışdan çıxarılaraq məhv edilib.

Qanunvericiliyin tələbini pozmuş 1 hüquqi və 6 fiziki şəxs barədə inzibati xəta haqqında protokol tərtib edilib. Bu şəxslər barəsində qanunvericilik qaydasında inzibati cərimələr tətbiq olunacaq.

Bu il mayın 17-dən indiyədək aparılmış nəzarət tədbirləri zamanı qanun pozuntusuna yol verdiyi müəyyən edilmiş 34 hüquqi şəxsə 132,5 min manat, 161 fiziki şəxsə 242 min manat cərimə tətbiq olunub.

İstehlakçılardan istifadə müddəti ötmüş, keyfiyyətsiz və saxta malların satışı halları ilə rastlaşdıqda 498-15-01 və 498-15-04 nömrəli telefonlarla İstehlak Bazarına Nəzarət üzrə Dövlət Xidmətinə məlumat vermələri xahiş olunur.

Pərvin ABBASOV