Azay Quliyev Fransa senatında təqdimat edib
12 sentyabr 2014 15:14 (UTC +04:00)

Azay Quliyev Fransa senatında təqdimat edib

Prezident yanında QHT-lərə Dövlət Dəstəyi Şurasının maliyyə dəstəyi ilə hazırlanan  "Şərq Tərəfdaşlığı ölkələrində qadın hüquqları: Azərbaycan misalı" adlı hesabatın  Brusseldə, Avropa Parlamentində keçirilən təqdimatından sonra, Fransa senatında da geniş təqdimatı olub. Şuradan Lent.az-a verilən məlumata görə, fransalı senator Eymeri de Monteskyenin sədrliyi ilə keçirilən təqdimatda Azərbaycan Respublikası Prezidenti yanında QHT-lərə Dövlət Dəstəyi Şurasının sədri, millət vəkili Azay Quliyev, Ailə Qadın və Uşaq Problemləri üzrə Dövlət Komitəsinin sədri Hicran Hüseynova, millət vəkili Məlahət İbrahimqızı, Azərbaycanının Fransa Respublikasında fövqəladə və səlahiyyətli səfiri Elçin Əmirbəyov, Fransa senatoru Helene Convay-Mouret, QHT-lərə Dövlət Dəstəyi Şurasının üzvü Rəna Mirzəzadə, Qadın Hüquqlarının Müdafiəsi üzrə Beynəlxalq Liqanın prezidenti  Anni Süjye, Fransada qadın hüquqlarının qorunmasında ixtisaslaşan  QHT-lər, araşdırmaçılar və jurnalistlər iştirak ediblər.
Tədbiri açan fransalı senator Eymeri de Monteskye Azərbaycanda qadın hüquqlarından və onların müdafiəsi üçün qanunvericilikdə görülən işlərdən danışıb. 
Tədbirdə çıxış edən Şura sədri Azay Quliyev rəhbərlik etdiyi qurumun fəaliyyəti ilə iştirakçıları tanış edib. Ölkəmizin sürətlə  inkişaf edən iqtisadiyyatı haqqında danışan millət vəkili A. Quliyev Azərbaycanın siyasi, iqtisadi, mədəni, sosial və digər sahələrdə  əldə etdiyi böyük nailiyyətlərindən danışıb. 
 
Azərbaycan-Fransa əlaqələri haqqında danışan A.Quliyev bildirdi ki, iki ölkə arasında əməkdaşlıq münasibətləri uğurla inkişaf edir. Şura sədri Strasburqda  Azərbaycanın birinci xanımı, millət vəkili Mehriban Əliyevanın rəhbərlik etdiyi Heydər Əliyev Fondunun dəstəyi ilə  Strasburq Kafedral kilsəsində aparılan bərpa işlərini,  Parisin Luvr muzeyində İslam incəsənəti departamentinin yaradılmasına Azərbaycanın verdiyi töhfəni və Bakıda Fransa məktəbinin inşasını misal çəkərək ölkələrimiz arasında əməkdaşlığın uğurla davam etdiyini deyib.
Daha sonra tədbirdə hesabatın müəlliflərindən biri, ərəb  ölkələrində qadın hüquqlarının müdafiəsi və təbliğinə dəstək verən fransalı ekspert Patrisia Lalond, Ailə, Qadın, Uşaq Problemləri üzrə Dövlət Komitəsinin sədri Hicran Hüseynova, millət vəkili Məlahət İbrahimqızı çıxış ediblər.
 
# 1742

Oxşar yazılar