Azərbaycan prezidenti Sankt-Peterburq görüşünə görə Putinə təşəkkür edib - YENİLƏNİB

“Tez-tez baş tutan görüşlər, əlbəttə, bizim münasibətlərimizin inkişafına yeni təkan verir”.

Lent.az-ın AzərTAc-a istinadən xəbərinə görə, bu sözləri Azərbaycan prezidenti İlham Əliyev bu gün Rusiya prezidenti Vladimir Putinlə görüşündə deyib.

Prezident bildirib ki, artıq çoxdan strateji tərəfdaşlıq səviyyəsinə çatmış bu münasibətlər bizim həyatımızın demək olar ki, bütün sahələrini əhatə edir: “Biz beynəlxalq məkanlarda fəal qarşılıqlı əlaqə saxlayırıq, siyasi dialoq fəallaşır, iqtisadi əlaqələr möhkəmlənir, nəqliyyat və energetika sahələrində də yaxşı nəticələr var, humanitar əməkdaşlıq inkişaf edir. Sentyabr ayında Bakıda Rusiya və Azərbaycan prezidentlərinin himayəsi altında növbəti Beynəlxalq Humanitar Forum keçiriləcək. Bütün bunlar bizim münasibətlərimizin inkişafı üçün möhkəm zəmin yaradır”.

Dövlət başçısı Ermənistan-Azərbaycan, Dağlıq Qarabağ münaqişəsinin tənzimlənməsi məsələsində Rusiyanın rolunu xüsusi vurğulayıb: “Biz bu rolu qiymətləndiririk və tənzimləmə prosesinin irəliləməsində sizin şəxsi iştirakınız çox böyük əhəmiyyət kəsb edir. İyun ayında Sankt-Peterburqda keçirilən görüş əsasən bu problemə həsr edilmişdi və şəxsən sizin həmin prosesdə fəal iştirakınıza görə təşəkkür edirəm”.

Prezident qeyd edib ki, bu gün həm də İran, Rusiya və Azərbaycan liderlərinin ilk üçtərəfli görüşü keçiriləcək: “Çox ümidverici olan bu yeni format ikitərəfli əməkdaşlıq çərçivəsində yaxşı potensiala malikdir və bu gün qarşılıqlı regional fəaliyyətin mühüm məsələləri müzakirə ediləcək. Fikrimcə, bu, həm ölkələrimizin iqtisadi inkişafına, həm də bizim regionda təhlükəsizlik sisteminin möhkəmlənməsinə şərait yaradacaq”.

16:04

Avqustun 8-də Azərbaycan prezidenti İlham Əliyevin və Rusiya prezidenti Vladimir Putinin görüşü olub.

Lent.az-ın AzərTAc-a istinadən xəbərinə görə, dövlət başçıları görüşdə çıxış ediblər.

15:38

Rusiya prezidenti Vladimir Putinin Azərbaycana səfəri başlayıb.

APA-nın məlumatına görə, o, əvvəlcə Azərbaycan prezidenti İlham Əliyevlə, sonra isə İran prezidenti Həsən Ruhani ilə ikitərəfli görüş keçirəcək.

Bunun ardınca isə üçtərəfli formatda görüş olacaq.

Görüşün sonunda yekun bəyannamənin imzalanması gözlənilir.