Qənirə Paşayeva: “Ermənistana özümüz təzyiq etməliyik”

Türkiyənin Muğla bölgəsində Muğla Sıtkı Koçman Universitetinin və orada təhsil alan azərbaycanlı tələbələrin təşkilatçılığı ilə “Dinməyən çığlıqlar: Xocalı Soyqırımı” adlı tədbir keçirilib.

Lent.az-ın məlumatına görə, tədbirdə çıxış edən millət vəkili Qənirə Paşayeva bildirib ki, Xocalı Soyqırımını törədənlər ədalət qarşısında cavab verməlidir: “Qarabağ dünyada yaşayan bütün azərbaycanlıların, türklərin vətənidir. Biz inanırıq ki, Ermənistanın işğal etdiyi Dağlıq Qarabağ da, işğal altındakı digər o gözəl bölgələr də tezliklə işğaldan azad olunacaq”.

İşğalçıların Dağlıq Qarabağın tarixini silmək üçün orada yerləşən mədəniyyət və tarixi abidələri məhv etdiyini deyən Q.Paşayeva bildirib ki, Ermənistanın işğal etdiyi Azərbaycan torpaqlarında törətdiyi vandalizm aktlarına, soyqırımlara bütün dünyanın gözü bağlıdır: “ Amma bu, belə davam etməyəcək. Beynəlxalq təşkilatlardan işğal altında olan torpaqlarımızı bizə vermələrini gözləməməliyik. AŞ, BMT kimi beynəlxalq təşkilatların Dağlıq Qarabağın Ermənistan tərəfindən işğalı ilə əlaqədar qəbul etdikləri qərarları vardır. Lakin bu qərarların heç biri tətbiq edilmir. Heç kim Ermənistana qarşı siyasi təzyiq göstərmir. O səbəbdən bunu özümüz etməliyik”.

Millət vəkili Qənirə Paşayeva çıxışında Xocalı Soyqırımı barədə ətraflı məlumat da verib. O bildirib ki, hər bir türk insanı Xocalı Soyqırımı, Qarabağ həqiqətlərinin dünyaya çatdırılması, bu soyqırımı törədənlərin öz layiqli cəzasını alması üçün çalışmalıdır.

Tədbirdə universitetdə təhsil alan azərbaycanlı tələbələr Xocalı soyqırımı ilə bağlı hazırladıqları ədəbi-bədii kompozisiyanı təqdim ediblər, şeirin, sənətin dili ilə Qarabağ acısını tədbir iştirakçıları ilə bölüşüblər. Xocalı Soyqırımı ilə bağlı sənədli filmin nümayiş edilməsindən sonra Azərbaycanın Əməkdar Artisti Nuriyyə Hüseynova “Xocalı laylası” əsərini ifa edib.

Tədbirdən sonra millət vəkili Q.Paşayeva Muğlada təhsil alan azərbaycanlı tələbələrlə də görüşüb.