Cəbhəyanı bölgələrdə 1420 partlamamış hərbi sursat aşkar edilib

ANAMA bu gün Agentlik tərəfindən Tərtər, Füzuli və Ağdam rayonlarında aşkar olunan partlamamış hərbi sursatlar (PHS) haqqında hesabatı açıqlayıb.

Agentliyin mətbuat xidmətindən Lent.az-a verilən məlumata görə, Tərtər rayonunun Ağkənd kəndində 3 ev və həyətyanı sahədə 4 partlayış yerinə baxış keçirilmiş, 14 000 kv. m ərazi, Qazyan kəndində 2 ev və həyətyanı sahədə 5 partlayış yerinə baxış keçirilib, 10 000 kv. m ərazi , Qaynaq kəndi - 3 otlaq sahəsində 3 partlayış yerinə baxış keçirilb və 600 kv. m ərazi yoxlanılıb.

Bununla gün ərzində 5 ev və həyətyanı sahədə, 3 otlaq sahəsində 12 partlayış yerinə baxış keçirilib, nəticə etibarı ilə 24 600 kv. m ərazi yoxlanılıb.

Bundan başqa, bu gün ərzində Ağdam rayonu Çəmənli kəndində 1 əkin sahəsində 1 partlayış yerinə baxış keçirilib, 5 000 kv. ərazi qəlpələrdən təmizlənib, heç bir PHS aşkar olunmayıb.

Cəmi 1 əkin sahəsində 1 partlayış yeri aşkar edilmiş və 5 000 kv.m ərazi təmizlənib.

Füzuli rayonunda isə Şükürbəyli kəndində 2 əkin sahəsində 2 partlayış yerinə baxış keçirilib, 420 kv.m ərazi qəlpələrdən təmizlənib, PHS aşkar olunmayıb.

Beləliklə cəmi 2 əkin sahəsi, 2 partlayış yeri aşkar edilmiş və 420 kv. m ərazi təmizlənib.

Məlumatda qeyd edilir ki, gün ərzində ümumilikdə 5 ev və həyətyanı sahədə, 6 otlaq sahəsi daxil olmaqla 15 partlayış yerinə baxış keçirilib, gün ərzində 30 020 kv. m ərazi təmizlənib.

Son olaraq qeyd edək ki, ümumilikdə Agentlik tərəfindən 7 Aprel - 13 May 2016-cı il tarixlərində Zərdab, Tərtər, Ağcabədi, Ağdam, Füzuli, Goranboy, Tovuz, Samux, Şəmkir, Cəlilabad, Ucar rayonlarında və Bakı şəhərində 474 ev və həyətyanı sahə, 2 hərbi hissə, 2 kənd qəbiristanlığı, 3 kənd orta məktəbi, 1 tibb məntəqəsi, 12 ferma, əkin sahələri və 1 çaxır zavodu ərazisinə baxış keçirilib, 1 420 ədəd partlamamış hərbi sursat, 11 ədəd piyada əleyhinə mina (PMN), 2 ədəd piyada əleyhinə POMZ-2 və 6 ədəd tank əleyhinə mina aşkar olunaraq zərərsizləşdirilib.

Hal-hazırda Agentlik tərəfindən yaradılan xüsusi təyinatlı mobil çevik qrupları minaaxtaran itlərin dəstəyi ilə təmas xəttində yerləşən kəndlərdəki evlərlə yanaşı məktəblər və digər obyektlərin yerləşdiyi ərazilərdə əməliyyatları davam etdirir.