Almaniya səfiri Şurada olub

Prezident yanında QHT-lərə Dövlət Dəstəyi Şurasında Almaniyanın ölkəmizdəki səfiri Haydrun Tempel və səfirliyin birinci katibi Frederik Hake ilə görüş keçirilib. Şuradan Lent.az-a verilən məlumata görə, Şura sədri, millət vəkili Azay Quliyev rəhbərlik etdiyi qurumun yaradılması zamanı qabaqcıl dünya təcrübəsindən bəhrələndiklərini bildirərək fəaliyyət istiqamətləri haqqında qonaqlara ətraflı məlumat verib. A. Quliyev ölkəmizdə 3 mindən artıq QHT-nin insan haqları, demokratiya, ekologiya, sosial, təhsil və digər sahələrdə çalışdığını bildirərək Şuranın ötən 6 illik fəaliyyəti dövründə heç bir ayrı-seçkilik etmədən 2500-dən artıq təşkilatın layihəsini maliyyələşdirdiyini və bunun ölkəmizdə vətəndaş cəmiyyətinin inkişafı üçün mühüm töhfə olduğunu vurğulayıb. Şura sədri həmçinin Azərbaycan hökumətinə milli QHT-lərin xarici mənbələrdən asılılığının aradan qaldırılması üçün gələn ildən yerli donorlara ayrılan vəsaitin həcminin bir neçə dəfə artırılması ilə bağlı təklif irəli sürdüklərini də qeyd edib.

H. Tempel Almaniya-Azərbaycan münasibətlərinin inkişafı, QHT-lər haqqında qanunvericiliyə edilən son əlavə və dəyişikliklər, onların üzləşdikləri çətinliklər barədə fikirlərini bölüşüb. Görüşdə qarşılıqlı maraq doğuran məsələlər ətrafında geniş fikir mübadiləsi aparılıb, qonaqların suallarına ətraflı cavab verilib.