"İran və Azərbaycan arasındakı əlaqələr önəm daşıyır" - İlham Əliyev

“Azərbaycan Respublikası ilə İran İslam Respublikası arasında ikitərəfli əlaqələr bütün sahələrdə çox yaxşı inkişaf edir və bu əlaqələr ölkələr, xalqlar və eləcə də bölgə üçün böyük önəm daşıyır”.

Lent.az-ın AzərTac-a istinadən məlumatına görə, bunu prezident İlham Əliyev İranın Qərbi Azərbaycan vilayətinin valisi Qurbanəli Səadət Qarabağinin başçılıq etdiyi nümayəndə heyətini qəbul edərkən deyib.

İlham Əliyev bildirib ki, son illər ərzində ikitərəfli əməkdaşlığın inkişafı məmnunluq doğurur

Qarşılıqlı səfərlərin əhəmiyyətinə toxunan Prezident İlham Əliyev İranın Qərbi Azərbaycan vilayətinin valisinin başçılıq etdiyi nümayəndə heyətinin Azərbaycana səfərinin və keçirəcəyi görüşlərin ölkələr arasında əlaqələrin daha da möhkəmləndirilməsi işinə xidmət edəcəyini əminliklə qeyd edib.

Ölkələr arasında ikitərəfli əlaqələrin əsasının Heydər Əliyev tərəfindən qoyulduğunu vurğulayan Qərbi Azərbaycan vilayətinin valisi Qurbanəli Səadət Qarabaği İranın Qərbi Azərbaycan vilayəti ilə Azərbaycan arasında kənd təsərrüfatı, ticarət, turizm və digər sahələrdə əməkdaşlıq üçün yaxşı perspektivlərin olduğunu deyib və bu məqsədlə Azərbaycanın müvafiq qurumları ilə görüşlər keçirəcəyini vurğulayıb.