Bayden tək deyil: ABŞ liderlərindən hansı prezidentlik yarışını tərk edib?

ABŞ prezidenti Co Bayden prezidentlik yarışından geri çəkilmək qərarını açıqlayıb və son 50 ildə seçkidən çəkilən ilk prezident olub.

Lent.az-ın xarici mediaya istinadən məlumatına görə, sonuncu dəfə belə bir hadisə 1968-ci ildə, uğursuz seçki kampaniyası və ABŞ-ın Vyetnam müharibəsində kütləvi iştirakı fonunda Lindon Conson yenidən seçilməkdən imtina etdiyi zaman baş verib.

1963-cü ildə Con Kennedinin öldürülməsindən sonra prezident olan Conson 1964-cü ildə yenidən prezident seçilib, lakin onun Vyetnamdakı Amerika hərbi varlığını artırmaq qərarı ölkədə kütləvi etirazlara və müharibə əleyhinə əhval-ruhiyyənin artmasına səbəb olub.

Uzun sürən və baha başa gələn Vyetnam müharibəsi Amerika əsgərləri arasında əhəmiyyətli itkilərlə nəticələnib və Consonun ictimai rəyini zədələyib. Nümayişlər, etirazlar və artan müharibə əleyhinə hərəkat prezidentə təzyiqləri artırıb.

Siyasi vəziyyətin gərginləşməsi və dəstək səviyyəsinin azalması ilə Conson 1968-ci il martın 31-də yenidən seçilmək istəməyəcəyini elan edib. Bu qərar ona diqqətini müharibəni bitirmək və daxili gərginliyi azaltmaq üçün bir yol tapmağa yönəltməyə imkan verib, həm də onun siyasi çətinliklərinin və böhranın öhdəsindən gələ bilməməsinin etirafı olub.

Baydenin iyulun 21-də verdiyi qərar, ikinci müddətə namizəd olmaq niyyəti ilə bağlı əvvəlki açıqlamalarını nəzərə alaraq çoxları üçün sürpriz olub. Vəziyyət bu addımın səbəbləri ilə bağlı aktiv müzakirələrə və çoxlu fərziyyələrə səbəb olub.