Amerikalı konqresmendən bölünmüş Azərbaycanı birləşdirmək təklifi

Amerikalı konqresmen Dan Rohrabaher ABŞ dövlət katibi Hillari Klintona məktub göndərərək İranda yaşayan azərbaycanlıların müstəqillik mübarizəsini dəstəkləməyə çağırıb. Lent.az-ın xəbərinə görə, bununla bağlı konqresmenin rəsmi səhifəsində məlumat yerləşdirilib.

Məlumatda qeyd olunur ki, Rohrabaherin məktubu bir müddət öncə Azərbaycan və İsrail arasında hərbi əməkdaşlıq informasiyası ilə bağlıdır: “ABŞ üçün bu əməkdaşlığı dəstəkləmək məqsədəuyğun olardı. Çünki Tehran rejimi bizim kimi bu dövlətlərin də düşmənidir”.

Məktubda qeyd olunur ki, İranda müstəqil Azərbaycana nisbətdə təxminən 2 dəfə çox (əslində isə təxminən 4 dəfə çox – red.) azərbaycanlı yaşayır: “Onların vətəni razılıqları olmadan 1828-ci ildə İran və Rusiya arasında bölünüb. Azərbaycan Respublikası 1991-ci ildə SSRİ dağılandan sonra müstəqillik qazanıb. İndi İran azərbaycanlılarının da müstəqillik qazanmasının vaxtı çatıb”.

Konqresmen məktubunda onu da vurğulayır ki, azərbaycanlıların müstəqillik uğrunda qanuni mübarizəsinə dəstək vermək alicənab işdir: “Bu, İran tiranları üçün yeraltı nüvə bunkerlərinin bombalanmasından daha böyük təhlükədir”.