“Diffamasiya ilə bağlı qanun zamanı gələndə qəbul ediləcək”

Lent.az-ın verdiyi məlumata görə, bunu bu gün Milli Məclisin 2012-ci il yaz və növbədənkənar sessiyalarının yekunlarına həsr olunmuş mətbuat konfransında vitse-spiker Bahar Muradova söyləyib. Bahar Muradova deyib ki, bu səbəbdən də “Diffamasiya haqqında” qanun layihəsinin qarşıdan gələn payız sessiyasında müzakirələrə çıxarılıb-çıxarılmayacağı və ya qəbul olunub-olunmayacağı barədə qəti fikir söyləyə bilməz. Bununla belə, vitse-spiker qeyd edib ki, diffamasiya ilə bağlı qanunun qəbul olunması yönündə ictimai müzakirələr davam edir: “Mən ATƏT-in fəaliyyətdə olan sədri və digər beynəlxalq təşkilatların rəsmiləri ilə görüşlərimdə də qeyd etmişəm ki, istənilən demokratik cəmiyyətdə söz və mətbuat azadlığının dərinləşdirilməsi üçün lazım olan bütün qanunlar, o cümlədən, “Diffamasiya haqqında” qanun qəbul oluna bilər. Ancaq yetər ki, cəmiyyət və zaman buna hazır olsun. Şəxsən biz bu yöndə başqa ölkələrin analoji qanunvericilik aktlarını, təcrübəsini də öyrənməyə hazırıq”.

Bahar Muradova bildirib ki, bu gün Avropanın bir sıra aparıcı ölkələri hələ də bu qanunu qəbul etməyib: “Ona görə, indi bu qanunun qəbul olunması ilə bağlı hansısa tərəfləri də başa düşmək olmur. Biz bu qanunun qəbulunu öhdəlik kimi götürməmişik. Bu sadəcə tövsiyədir. Bununla belə, bir daha qeyd etmək istəyirəm ki, zamanı gələndə biz bu qanunun müzakirəsinə və qəbuluna hazırıq. Onu da qeyd edim ki, bu yöndə ictimai müzakirələr bundan sonra da davam etdiriləcək”.