“Beynəlxalq hüquq və Dağlıq Qarabağ münaqişəsi”
26 sentyabr 2011 17:18 (UTC +04:00)

“Beynəlxalq hüquq və Dağlıq Qarabağ münaqişəsi”

Sentyabrın 23-də sentyabr Azərbaycanın Macarıstandakı səfirliyində Azərbaycanın Moldovadakı səfiri Namiq Əliyevin “Beynəlxalq hüquq və Dağlıq Qarabağ münaqişəsi” kitabının macar dilində tərcüməsinin təqdimatı keçirilib.

Xarici İşlər Nazirliyinin mətbuat xidmətindən Lent.az-a verilən məlumata görə, tədbirdə Macarıstanın dövlət və qeyri-dövlət təşkilatlarının nümayəndələri, tanınmış alimlər, hüquqşünaslar, diplomatik korpus və KİV nümayəndələri iştirak ediblər.

Tədbiri Azərbaycanın Macarıstandakı səfiri Vilayət Quliyev açıb. Vilayət Quliyev deyib ki, Ermənistanın Azərbaycana qarşı təcavüzü barədə Macarıstan ictimaiyyətinin məlumatlandırılması baxımından macar dilində qeyd edilən kitabın nəşri olduqca vacib hadisə və təbliğat sahəsində atılan növbəti mühüm addımdır. Namiq Əliyev isə çıxışında kitabının məzmunu barədə məlumat verib, Ermənistan-Azərbaycan münaqişəsi, onun tarixi və hazırkı durumu, habelə mümkün tənzimləmə yolları barəsində danışıb.

Tədbirdə Macarıstan parlamentinin beynəlxalq məsələlər üzrə komitəsinin sədr müavini Marton Dyöndöşi, Macarıstan Xarici İşlər Nazirliyinin keçmiş dövlət katibi, BMT Təhlükəsizlik Şurası tərəfindən Ermənistanın Azərbaycana qarşı təcavüzü ilə əlaqədar qətnamələrin qəbul edildiyi dövrdə Macarıstanın BMT-də daimi nümayəndəsi olmuş səfir Andre Ördöş, Moldovanın Budapeştdəki səfiri A.Kodreanu, AzərTAC-ın Almaniya müxbiri Vüqar Seyidov çıxış ediblər. Onlar Ermənistanı Azərbaycana qarşı təcavüzə son qoymağa çağırıb, münaqişənin həlli istiqamətində beynəlxalq birlik tərəfindən daha qətiyyətli addımların atılmasının zəruri olduğunu vurğulayıblar.

Tədbirin sonunda Namiq Əliyev tədbir iştirakçılarının çoxsaylı suallarını cavablandırıb.
# 570

Oxşar yazılar