Azərbaycan və Hindistan arasında siyasi məsləhətləşmə keçirilib

Bu gün Azərbaycan Respublikası və Hindistan Respublikası xarici işlər nazirlikləri arasında siyasi məsləhətləşmələr keçirilib.

Xarici İşlər Nazirliyinin mətbuat xidmətindən Lent.az-a verilən məlumata görə, Azərbaycan tərəfindən nümayəndə heyətinə xarici işlər nazirinin müavini Xələf Xələfov, Hindistan tərəfindən isə Azərbaycanda səfərdə olan Hindistan Respublikasının Xarici İşlər Nazirliyinin Şərq ölkələri üzrə dövlət katibi Sancay Sinqh başçılıq ediblər.

Xələf Xələfov Azərbaycanın Hindistanla əlaqələrə önəm verdiyini və mövcud əlaqələrin daha da dərinləşdirilməsinin vacib olduğunu bildirib. O, parlamentlərarası əlaqələrin ikitərəfli münasibətlərin inkişaf etdirilməsində mühüm rol oynadığını, parlamentlərarası dostluq qruplarının üzvlərinin qarşılıqlı səfərlərinin təşkil olunmasının faydalı olacağını söyləyib.

Sancay Sinqh ölkəsinin Azərbaycanla müxtəlif sahələrdə, xüsusilə də ticarət, humanitar, təhsil və enerji sahələrində əlaqələrin genişləndirilməsində maraqlı olduğunu diqqətə çatdırıb. Məsləhətləşmələr zamanı informasiya və kommunikasiya texnologiyaları sahəsində əməkdaşlığın qurulması, iki ölkə arasında Hökumətlərarası Birgə Komissiyanın ilk iclasının yaxın zamanlarda keçirilməsi, 2012-ci ildə qarşılıqlı olaraq mədəniyyət günlərinin və kinofestivalların keçirilməsi, eyni zamanda biznes forumların təşkili istiqamətində işlərin aparılması barədə ətraflı fikir mübadiləsi aparılıb.