Azərbaycanlılar Türkiyə-Suriya sərhədində əməliyyat keçirəcək

ANAMA Türkiyənin NOKTA Şirkəti ilə Türkiyə-Suriya keçid terminalı ərazilərinin minalardan təmizlənməsi əməliyyatları üzrə müqavilə imzalayıb. Lent.az-ın ANAMA-nın saytına istinadən verdiyi məlumata görə, müqaviləyə əsasən ANAMA Türkiyə-Suriya keçid terminalı ərazisində mexaniki mina təmizləmə əməliyyatlarını və xarici keyfiyyət yoxlaması xidmətini həyata keçirəcək. Piyada və tank əleyhinə minalarla çirklənmiş ərazinin ümumi sahəsi 160.000 kvadrat metrdir.

Hal-hazırda razılaşmaya uyğun olaraq ANAMA-nın BOZENA – 4 kiçik çarxlı mexaniki minatəmizləyən maşını Türkiyənin Karkamış ərazisinin Qazıintep qəsəbəsində minatəmizləmə əməliyyatlarını həyata keçirir. Avqust ayından bu günə kimi 100.000 kvadrat metrdən artıq ərazi təmizlənib və 50-dən artıq müxtəlif çaplı piyada və tank əleyhinə minalar tapılıb zərərsizləşdirilib. Türkiyə-Suriya keçid terminalı ərazisində aparılan minatəmizləmə əməliyyatları 26 avqust 2011-ci il tarixində başlanıb və 2 ay müddətinə davam etdiriləcək.