Azərbaycan prezidenti ölkəmizdə olan mühüm qonaqları qəbul edib

Sentyabrın 12-də Azərbaycan prezidenti İlham Əliyev Ümumdünya Səhiyyə Təşkilatının (ÜST) baş direktoru, xanım Marqaret Çanı qəbul edib. Lent.az-ın prezidentin saytına istinadən verdiyi məlumata görə, M. Çan ÜST-nin Avropa Regional Komitəsinin 61-ci sessiyasının Bakıda yüksək səviyyədə təşkilinə görə Azərbaycan hökumətinə və şəxsən prezident İlham Əliyevə minnətdarlığını bildirib. O, dünyanın 53 ölkəsini təmsil edən nümayəndə heyətlərinin bu tədbirdə iştirakının ölkəmizdə gedən inkişaf prosesləri ilə yaxından tanış olmaq baxımından önəmini qeyd edib.

Öz növbəsində, dövlət başçısı ÜST-nin Avropa Regional Komitəsinin 61-ci sessiyasının Bakıda keçirilməsinin əhəmiyyətini vurğulayıb. Prezident dünyanın müxtəlif ölkələrindən olan nümayəndə heyətlərinin Azərbaycanla, o cümlədən ölkəmizdə səhiyyə sahəsində görülən işlərlə yaxından tanış olması üçün bu tədbirin yaxşı fürsət yaratdığını bildirib.

Dövlət başçısı ÜST-nin Azərbaycana göstərdiyi dəstəyə görə təşəkkürünü bildirdi. Təşkilatla Azərbaycanın müvafiq qurumları arasında uğurlu əməkdaşlığın həyata keçirildiyini qeyd edən prezident bu əməkdaşlığın gələcəkdə daha da genişlənəcəyinə ümidvar olduğunu bildirib.

Azərbaycan prezidenti İlham Əliyev sentyabrın 12-də Almaniya Federativ Respublikasının sabiq xarici işlər naziri Yoşka Fişeri də qəbul edib. Görüşdə Azərbaycanla Almaniya arasında ikitərəfli münasibətlər, Avropanın enerji təhlükəsizliyində Azərbaycanın rolu, regional və beynəlxalq məsələlər ətrafında fikir mübadiləsi aparılıb.

Bu gün prezident İlham Əliyev həmçinin Fransanın nəqliyyat üzrə dövlət katibi Tierri Marianinin başçılıq etdiyi nümayəndə heyətini qəbul edib. Görüşdə Azərbaycanla Fransa arasında ikitərəfli əlaqələrin inkişafından məmnunluq ifadə olunub, Fransa şirkətlərinin Azərbaycanda uzun illər uğurla fəaliyyət göstərdiyi qeyd edilib, nəqliyyat sektorunda əməkdaşlıq məsələlərinə dair fikir mübadiləsi aparılıb.