SAM-da Avropa ölkələrinin beyin mərkəzlərinin nümayəndələri ilə görüş keçirilib - FOTO

Sentyabrın 6-da İspaniya, İtaliya, İslandiya, Estoniya və Ukraynanın müxtəlif beyin mərkəzlərinin nümayəndələri və parlament üzvləri ilə Azərbaycan Respublikasının Prezidenti yanında Strateji Araşdırmalar Mərkəzində (SAM) görüş keçirilib.

SAM-dan Lent.az-a verilən məlumata görə, beyin mərkəzlərinin nümayəndələrinə və parlament üzvlərinə SAM-ın fəaliyyəti – nəşr edilmiş elmi dərgilər, yerli və beynəlxalq əhəmiyyətli tədbirlər və perspektivli layihələr haqqında məlumat verilib.

Beyin mərkəzləri arasında elmi-tədqiqat sahəsində müxtəlif layihələrin və tədbirlərin həyata keçirilməsi vacib sayılıb. Görüşdə Cənubi Qafqaz regionun geosiyasəti, Avropa Birliyinin region ölkələri ilə münasibətləri, Qarabağ münaqişəsinin həlli ilə bağlı davam edən danışıqlar prosesində mövcud durum, Yaxın Şərq regionunda qeyri-sabit vəziyyət, beynəlxalq təhlükəsizlik və digər bu kimi əhəmiyyət kəsb edən məsələlər müzakirə mövzusu olub.

Qonaqlar isə “Avropa Birliyinin Xəzər regionuna baxışı: Yumşaq Güc yoxsa Realpolitik” mövzusunda sentyabrın 7-də Bakıda keçiriləcək konfrans, eyni zamanda həyata keçirəcəkləri layihələrlə bağlı məlumat veriblər.