Elmar Məmmədyarov Rusiyaya iyulun 17-də gedəcək

APA-nın məlumatına görə, E. Məmmədyarov bu gün jurnalistlərə verdiyi açıqlamasında Rusiyaya iyulun 17-də səfər edəcəyini bildirib. Rusiyanın xarici işlər naziri Sergey Lavrovun dəvəti əsasında baş tutacaq səfər iki gün çəkəcək.

Səfər çərçivəsində Dağlıq Qarabağ münaqişəsinin həllinə dair danışıqların hazırkı durumu müzakirə ediləcək, Rusiya ilə Azərbaycan arasında dövlət sərhədi haqqında müqavilənin ratifikasiyası haqqında sənəd mübadiləsi aparılacaq, iki ölkə arasında xarici siyasət sahəsində əməkdaşlığın daha da möhkəmləndirilməsini nəzərdə tutan bir sıra qərarlar qəbul olunacaq.