Əli Əhmədov: “Onlar aldadılmış, səhv yola çəkilmiş gənclərdir”

Lent.az-ın Yeni Azərbaycan Partiyasının saytına istinadən məlumatına görə, bunu Oğuzda “Yay məktəbi” layihəsi çərçivəsində YAP gəncləri ilə görüşən partiyanın İcra Aparatının rəhbəri, deputat Əli Əhmədov deyib.

O bildirib ki, Azərbaycan 90-cı illərin əvvəllərində çox böyük faciələr yaşayıb: “Anarxiya baş alıb gedirdi, iqtisadiyyat iflic olmuşdu, ölkə bütövlükdə müflis olmuşdu. Azərbaycan bir neçə nəfərin başabəla siyasəti nəticəsində pis vəziyyətə qalmışdı”.

YAP rəsmisi deyib ki, Heydər Əliyev Azərbaycanı həmin səriştəsiz adamların əlindən xilas edib və indi sabitlik, dinclik, rifah, inkişaf təmin olunub: “Bu gün insanlarımız yalnız çörək tapmaq haqqında düşünmürlər. Övladını məktəbə yola salan valideyn onun sağ-salamat gələcəyinə əmindir. İndi insanlar daha yaxşı həyat istəyirlər. Bu il Azərbaycan ötən ilkindən daha yaxşıdır, gələn il bu ilkindən də yaxşı olacaq. Bunu siz özünüz gündəlik həyatınızda görürsünüz. İnsanların daha yaxşı yaşamaq istəməsi və hökumətin bu istiqamətdə səy göstərməsi inkişafın nümunəsidir. Azərbaycan inkişaf edir və hər il daha da inkişaf edəcək”.

Qeyd edək ki, “Yay məktəbi” hər il təşkil olunur. Bu ilki layihədə iştirak edən 600 gəncin 300-ü Bakı şəhərini, 300 nəfəri isə ölkənin bölgələrini təmsil edir. Gənclər "Yay məktəbi"ndə 4 qrup halında iştirak edirlər. Layihənin məqsədi isə gənclərin həm asudə vaxtlarını yaxşı keçirmələri, bir-birilə təmas, münasibət qurmaları, eləcə də, onlar üçün intellektual və əyləncəli yarışların, idman oyunlarının təşkilidir.