TBMM üzvü: “Sərhədlərin açılması barədə qərarın qəbuluna imkan verməyəcəyik”

APA-nın xəbərinə görə, bunu Türkiyə Böyük Millət Məclisinin (TBMM) Milliyyətçi Hərəkat Partiyasından (MHP) olan üzvü Sinan Oğan Bakıda jurnalistlərə açıqlamasında deyib.
Son zamanlar yenidən bəzi mətbuat orqanlarında sərhədlərin açılacağına dair məlumatların yer aldığını qeyd edən TBMM üzvü bəzi qüvvələrin sərhədlərin açılması məsələsini yenidən gündəmə gətirmək istədiklərini söyləyib: “Lakin mən qətiyyətlə deyə bilərəm ki, sərhədlər o zaman açılacaq ki, Ermənistan işğal etdiyi Azərbaycan torpaqlarından çəkiləcək, Türkiyəyə yönəlik əsassız iddialarından vaz keçəcək. Bu olmasa, biz Türkiyə parlamentində sərhədlərin açılması barədə qərar qəbul olunmasına imkan verməyəcəyik”.

S. Oğan millət vəkili kimi fəaliyyəti dövründə Türkiyədə yaşayan 3 milyona yaxın azərbaycanlının hüquqlarının müdafiə edəcəyini də deyib.

O, eyni zamanda Türkiyə-Azərbaycan əlaqələrinin güclənməsinə, parlamentlərarası əlaqələrin genişlənməsinə çalışacağını da bildirib. TBMM üzvü digər ölkələrin parlament nümayəndələri ilə keçirəcəkləri görüşlərdə də Azərbaycan, Qarabağ mövzusunu gündəmə gətirəcəklərini vurğulayıb.

Qeyd edək ki, əslən azərbaycanlı olan Sinan Oğan Dünya Azərbaycanlılarının III Qurultayında iştirak etmək üçün Bakıya gəlib.