Binəqədidə Silahlı Qüvvələr Günü qeyd edilib - FOTO

Bu barədə Lent.az-a RİH ictimai təşkilatlar və siyasi partiyalarla iş şöbəsinin müdiri Natiq Əliyev məlumat verib. Rayon ərazisində yerləşən hərbi hissələrdən olan əsgər və zabitlərin iştirakı ilə keçirilən tədbiri giriş sözü ilə açan RİH başçısı Alı Qocayev bu əlamətdar bayram münasibəti ilə tədbir iştirakçılarını təbrik edərək Azərbaycanda ordu quruculuğunun inkişafından və ölkə başçısı İlham Əliyevin uğurlu siyasəti nəticəsində bu sahədə əldə olunan nailiyyətlərdən, xalq-ordu münasibətlərindən danışıb.

Sonra çıxış edənlər – Respublika Hərbi Komissarlığının zabiti, kapitan Yasin Aşurov, Müdafiə Nazirliyinin “N” saylı hərbi hissəsinin qərargah rəisi, mayor Yamən Əhmədov və əsgər Cavid Məmmədov Azərbaycan ordusunun hazırda regionun ən qüdrətli və yüksək döyüş hazırlığına malik bir ordusu olduğunu qeyd ediblər.

Sonda hərbi xidmətdə fərqlənən bir qrup gənc əsgər və zabit Rayon Gənclər və İdman İdarəsinin fəxri fərmanları və RİH-in qiymətli hədiyyələri ilə mükafatlandırılıblar.