Binəqədidə Respublika Günü qeyd edilib - FOTO

Bu barədə Lent.az-a Rayon İcra Hakimiyyəti (RİH) Aparatının ictimai təşkilatlar və siyasi partiyalarla iş şöbəsinin müdiri Natiq Əliyev məlumat verib. RİH başçısı Alı Qocayev tədbir iştirakçılarını bu əlamətdar gün münasibətilə təbrik edərək, 1918-ci ilin mayında şərqdə ilk demokratik təsisat olan AXC-nin yaranmasının təkcə Azərbaycana deyil, eyni zamanda bütün şərqə böyük təsir göstərdiyini bildirib. O, bu dövlət tərəfindən əsası qoyulmuş ideyaların Azərbaycanın müstəqilliyini bərpa etdikdən sonra Heydər Əliyevin yorulmaz fəaliyyəti, gərgin əməyi nəticəsində reallığa çevrildiyini diqqətə çatdırıb.

AMEA-nın müxbir üzvü, tarixçi-alim Vəli Əliyev, Bakı Dövlət Universitetinin professoru, tarix elmləri doktoru İbrahim Zeynalov, 283 saylı orta məktəbin tarix müəllimi Rahilə Heydərli çıxış edərək Azərbaycan Xalq Cümhuriyyətinin yaranması, fəaliyyəti, şərqdə ilk demokratik dövlət kimi formalaşmasından, süqutundan və müstəqillik dövründə əldə olunan nailiyyətlərdən danışıblar.

Sonra RİH və Gənclər və İdman İdarəsi tərəfindən orta məktəblərin şagirdləri arasında keçirilmiş “Doğma Azərbaycanım” mövzusunda bədii-qiraət müsabiqəsinin qalibləri fəxri fərman və diplomlarla mükafatlandırılıb.

Sonda məktəblilərin ifasında ədəbi-bədii kompozisiyaya baxış keçirilib.