Elmar Məmmədyarov ABŞ konqresmenlərini qəbul edib

Xarici İşlər Nazirliyinin mətbuat xidmətindən Lent.az-a verilən məlumata görə, görüşdə konqresmenlər Azərbaycanla ABŞ arasında aparılan əməkdaşlıqdan məmnunluq ifadə ediblər. Onlar ölkəmizin ABŞ-ın müttəfiqi kimi mühüm rolunu vurğulayıblar. Bununla yanaşı, Azərbaycanın beynəlxalq terrorizmlə mübarizəyə verdiyi töhfə və dəstək, ölkəmizin qlobal enerji təhlükəsizliyində artan rolu, regional və qlobal sabitliyin təmin olunmasında iştirakı yüksək qiymətləndirilib.

Nazir ABŞ Konqresində Ermənistan - Azərbaycan münaqişəsi barədə dolğun və dəqiq məlumatların yayılmasının əhəmiyyətini vurğulayıb. E.Məmmədyarov Ermənistan - Azərbaycan Dağlıq Qarabağ münaqişəsinin ərazi bütövlüyü əsasında həllinin, regionda sülh və sabitliyin təmin olunması üçün işğalçı qüvvələrin Azərbaycanın ərazilərindən çıxarılmasının, Azərbaycanın ərazi bütövlüyünün bərpasının və məcburi köçkünlərin öz torpaqlarına qayıtmasının vacibliyini qeyd edib.

Görüş zamanı nazir Azərbaycanda və regionda cərəyan edən proseslər barədə məlumat verib, Cənubi Qafqaz regionun inkişafında və regional əməkdaşlığın genişləndirilməsində Azərbaycanın rolunu qeyd edib. Qarşılıqlı maraq doğuran digər regional və qlobal məsələlər ətrafında da fikir mübadiləsi aparılıb.