Sabir Rüstəmxanlı Tatarıstanda “Qabdulla Tukay ili”ndədir

VHP mətbuat xidmətindən Lent.az-a verilən məlumata görə, 2011-ci ili “Qabdulla Tukay ili” elan edən Tatarıstanda yubiley dövlət səviyyəsində və çox böyük təntənə ilə qeyd edilir. S.Rüstəmxanlı azərbaycanlı nümayəndə heyəti adından dünən yubiley mərasimi çərçivəsində keçirilən elmi-praktik konfransda geniş məruzə ilə çıxış edib.

Aprelin 27-də isə Azərbaycan nümayəndə heyəti Tatarıstan prezidenti Rüstəm Minnixanov tərəfindən qəbul edilib. Görüşdə məşhur tatar şairi Qabdulla Tukayın yaradıcılığı, iki ölkə arasında qarşılıqlı mədəni əlaqələr, ədəbiyyat və incəsənət sahəsində əməkdaşlıq, həmçinin, əlaqələrin daha da genişləndirilməsi müzakirə edilib.

S.Rüstəmxanlı səfər çərçivəsində Kazanda fəaliyyət göstərən Azərbaycan diasporunun nümayəndələri ilə Azərbaycan Mədəniyyət Mərkəzində görüş keçirib, diasporun işi ilə bağlı fikirlərini bölüşüb.

Xatırladaq ki, yubiley törənində Azərbaycandan xalq yazıçısı Anar, xalq şairi Sabir Rüstəmxanlı, Qabdulla Tukayın tərcüməçisi Məmməd Kazım və AMEA Ədəbiyyat İnstitutunun əməkdaşları iştirak edirlər.