Bitərəf deputatlar MSK-ya namizədlərini müəyyənləşdirdilər

Fevralın 14-də Milli Məclisdə heç bir siyasi partiyaya mənsub olmayan deputatların iclası keçirilib.

Lent.az-ın Milli Məclisin rəsmi saytına istinadən verdiyi məlumata görə, iclasda Milli Məclis Aparatının rəhbəri Səfa Mirzəyev iştirak edib. İclasın gündəliyinə heç bir siyasi partiyaya mənsub olmayan (bitərəf)deputatların Mərkəzi Seçki Komissiyasındakı nümayəndələrinin razılaşdırılması məsələsi daxil edilib. İclası açan heç bir siyasi partiyaya mənsub olmayan deputatların nümayəndəsi, Milli Məclis sədrinin müavini Valeh Ələsgərov bildirib ki, Mərkəzi Seçki Komissiyası (MSK) həmişə olduğu kimi, ötən ilin noyabr ayında keçirilmiş parlament seçkilərini də yüksək səviyyədə təşkil edib, lazımi maarifləndirmə işlərini aparıb.

Qeyd olunub ki, bugünkü iclasın da məqsədi heç bir siyasi partiyaya mənsub olmayan deputatların MSK-ya namizədlərini təqdim və təsdiq etməkdir. Bunlardan Məmmədov Natiq Seyfulla oğlunun namizədliyi hakim Yeni Azərbaycan Partiyasının, Muxtarova Arifə Ağaverdi qızının namizədliyi isə Milli Məclisdə azlıq təşkil edən partiyaların nümayəndələri ilə razılaşdırılmalıdır. Digər namizədlər isə Həsənov Tofiq Eldar oğlu, Məmmədov İlham Sabir oğlu, Nadirov Nizami Hüseyn oğlu, Tağıyev Azər Cabir oğlu və əvəzedici qismində namizəd Adilov Nadir Adil oğludur.
Sonra iclasda iştirak edən deputatlar çıxış edərək MSK üzvlüyünə namizədlər barədə fikirlərini söyləyiblər. İclasın sonunda adları sadalanan şəxslərin namizədliyinə razılıq verilib və məsələ Milli Məclisin iclasında müzakirəyə tövsiyə edilib.