Polşanın Akademiya direktoru SAM-ın elmi heyəti ilə görüşüb

Azərbaycanda səfərdə olan Polşa Respublikasının Avropa Diplomatiya Akademiyasının direktoru Katarijna Pisarska Azərbaycan Respublikası Prezidenti yanında Strateji Araşdırmalar Mərkəzinin (SAM) elmi heyəti ilə görüşüb.

SAM-dan Lent.az-a verilən məlumata görə, Katarijna Pisarska rəhbərlik etdiyi Avropa Diplomatiya Akademiyasının fəaliyyəti, tədqiqat sahələri bərədə geniş məlumat verib.

O deyib ki, səfərində əsas məqsədlərindən biri Azərbaycanın “beyin mərkəzləri” ilə münasibətlərin yaradılması və əməkdaşlıq perspektivlərini müzakirə etməkdən ibarətdir. Katarijna Pisarska rəsmi Varşavanın Azərbaycanı Avropanın ayrılmaz bir parçası olaraq gördüyünü və 2011-ci ilin iyul ayında Polşanın Avropa Birliyinə sədrliyi dövründə Şərq Tərəfdaşlığı Proqramı çərçivəsində Cənubi Qafqaz regionu, xüsusilə də Azərbaycanla münasibətlərin inkişafının prioritet olacağını vurğulayıb.

Katarijna Pisarskaya SAM-ın fəaliyyəti – nəşr edilmiş elmi dərgilər, yerli və beynəlxalq əhəmiyyətli tədbirlər və perspektivli layihələr, o cümlədən ölkəmizin iqtisadi inkişafı, həyata keçirilən demokratik quruculuq prosesi, Dağlıq Qarabağ münaqişəsinin nizamlanmasına dair dövlətimizin mövqeyi barədə ətraflı məlumat verilib. Görüşdə regional və beynəlxalq məsələlər və bir sıra qarşılıqlı maraq kəsb edən mövzular ətrafında geniş fikir mübadiləsi aparılıb.