Prezident İlham Əliyev Ümumdünya Ağır Atletika Federasiyasının prezidentini qəbul edib

Azərbaycan Respublikasının prezidenti İlham Əliyev Ümumdünya Ağır Atletika Federasiyasının prezidenti Tomaş Ayanı qəbul edib.

Lent.az-ın AzərTAC-a istinadən verdiyi məlumata görə, Tomaş Ayan rəhbərlik etdiyi Federasiyanın növbəti konqresinin Bakıda keçirilməsi barədə qərar qəbul olunduğunu söyləyib və bu konqresin əhəmiyyətini vurğulayıb.

Tomaş Ayan bildirib ki, konqresdə 100-dən çox ölkənin təmsil olunacaq, tədbirdən sonra 25 ölkədən olan idmançıların iştirakı ilə yarışların keçiriləcək. Dövlət başçısı Tomaş Ayanla XXX London Yay Olimpiya Oyunları zamanı görüşünü məmnunluqla xatırlayıb. Prezident İlham Əliyev Ümumdünya Ağır Atletika Federasiyasının növbəti konqresinin Bakıda keçirilməsinin önəmli olduğunu qeyd edib.

Görüşdə Azərbaycanda idmanın bütün növlərinin, o cümlədən ağır atletikanın inkişafına göstərilən yüksək dövlət qayğısından danışılıb, Azərbaycan idmançılarının nüfuzlu beynəlxalq yarışlarda əldə etdikləri uğurların önəmi qeyd olunub, ölkəmizin Ümumdünya Ağır Atletika Federasiyası ilə əməkdaşlığının bundan sonra da genişlənəcəyinə əminlik ifadə edilib.