Deputatlarımız Rumıniyadakı seçkiləri izləyiblər

Milli Məclisin Azərbaycan-Rumıniya parlamentlərarası İşçi Qrupunun sədri, Azərbaycanın ATƏT Parlament Assambleyasında nümayəndə heyətinin üzvü Azay Quliyev və millət vəkili Eldar İbrahimov parlament seçkilərini müşahidə etmək məqsədilə Rumıniyada səfərdə olublar. Lent.az-ın məlumatına görə, səfərin ilk günündə millət vəkilləri Buxarest şəhərindəki Tey Parkı – Heydər Əliyev xiyabanını ziyarət ediblər.

Seçkilər günü azərbaycanlı millət vəkilləri Buxarestin 1-ci sektor bələdiyyəsində seçki məntəqələrini gəzib, seçkilərin beynəlxalq standartlara və milli qanunvericiliyə uyğunluğunu yoxlayıb, məntəqələrdəki komissiya üzvləri ilə fikir mübadiləsi aparıb, ümumilikdə prosesin gedişatını yaxından izləyiblər. Seçkidən bir gün sonra millət vəkillərimiz seçki prosesinin yekunlarına həsr olunan ATƏT Parlament Assambleyasının nümayəndələrinin iclasında iştirak etmiş, öz müşahidələrini açıqlayıblar.

Qeyd edək ki, səfər zamanı millət vəkilləri Rumıniyadakı Səfirliyimizdə olub, ikitərəfli əlaqələr, o cümlədən ölkəmizin Rumıniya milli qanunvericilik orqanı, həmçinin Avropa Parlamenti, ATƏT, Avropa Şurası Parlament Assambleyası ilə əməkdaşlığının cari vəziyyəti və gələcək istiqamətləri ilə bağlı fikir mübadiləsi aparıblar.