Ramil Usubov İnterpolun sessiyasında iştirak edir - FOTO

Daxili işlər naziri Ramil Usubov rəhbərliyi ilə ölkəmizin nümayəndə heyəti noyabrın 5-də Romada keçirilən Beynəlxalq Kriminal Polisi Təşkilatının (İnterpol) Baş Assambleyasının 81-ci sessiyasında iştirak etmək məqsədilə İtaliyada səfərdədir.

Azərbaycanın İtaliyadakı səfirliyindən Lent.az-a verilən məlumata görə, noyabrın 5-də sessiyanın Nazirlər Görüşü zamanı İnterpolun prezidenti Hu Bun Hyui və İnterpolun baş katibi Ronald Nobl çıxış ediblər.

Ramil Usubov açılış sessiyasında digər ölkələrin nümayəndə heyətlərinin rəhbərləri ilə bir sıra işçi görüşlər, sessiya çərçivəsində İtaliya daxili işlər naziri Anna Mariya Kançelliyeri ilə rəsmi görüş keçirib. Anna Mariya Kançelliyeri ilə görüş zamanı Ramil Usubov ölkəmizdə dövlət müstəqilliyinin, demokratik prinsiplərin möhkəmlənməsi, hüquqi, dünyəvi, iqtisadi baxımdan güclü dövlət quruculuğu işləri, ictimai münasibətləri tənzimləyən hüquq mexanizmlərinin təkmilləşdirilməsi prosesinin uğurla davam etdiyi barədə məlumat verib. O, ölkələrimiz arasında bütün sahələrdə əlaqələrin durmadan genişləndiyini söyləyib, hüquq-mühafizə sahəsində də əməkdaşlığın inkişafını vacib sayıb. Anna Mariya Kançelliyeri İtaliyanın da Azərbaycanla daha geniş əməkdaşlığa hazır olduğunu nəzərə çatdırıb Daha sonra daxili işlər nazirləri “Azərbaycan Respublikasının Daxili İşlər Nazirliyi və İtaliya Respublikasının Daxili İşlər Nazirliyi arasında əməkdaşlıq haqqında Saziş”i imzalayıblar.

Günün sonunda dahi Azərbaycan şairi Nizami Gəncəvinin Romadakı heykəlinə Azərbaycan nümayəndə heyəti tərəfindən əklil qoyulub.