Bosniya və Herseqovinann dövlət başçısı: “Azərbaycanın sərmayələrinə ehtiyacımız var”

Lent.az-ın AzərTAc-a istinadən verdiyi məlumata görə, parlamentin binası önündə qonağı Milli Məclisin sədri Oqtay Əsədov və digər rəsmi şəxslər qarşılayıblar.

Sonra Bosniya və Herseqovinanın Rəyasət Heyətinin sədri ilə Milli Məclisin sədri arasında görüş olub. Bosniya və Herseqovinanın Azərbaycanın dostu olduğunu deyən Oqtay Əsədov bildirib ki, bu səfər iki ölkə arasındakı əlaqələrin inkişafına şərait yaradacaq və gələcək əməkdaşlığımıza da böyük töhfə verəcək. Erməni silahlı birləşmələrinin Azərbaycanda törətdikləri qətliamları xatırladan O. Əsədov vurğulayıb ki, bir çox ölkələrin parlamentlərində bu soyqırımı tanınıb. Bosniya və Herseqovina parlamentində də bu soyqırımına qiymət verilsə Azərbaycan üçün çox önəmli olar.

Ermənistan-Azərbaycan, Dağlıq Qarabağ münaqişəsinə toxunan B. İzetbeqoviç bu problemin ölkəmizin ərazi bütövlüyü çərçivəsində, beynəlxalq hüququn normaları və prinsipləri əsasında həll olunmasının vacibliyini qeyd edib. Vurğulayıb ki, səfər çərçivəsində keçirilən görüşlər ölkələrimiz arasındakı münasibətlərin genişləndirilməsinə xidmət edir. Qonaq həm siyasi, həm də iqtisadi sahədəki mövcud əməkdaşlığın daha da inkişaf etdirilməsinin zəruriliyini xüsusi vurğulayaraq deyib: “Ümid edirəm ki, Azərbaycan qazı bizim ölkəyə də çatacaq. Çünki bu qaza və Azərbaycanın sərmayələrinə bizim də ehtiyacımız var. Azərbaycan sərmayələrinin yatırılması üçün Bosniya və Herseqovinada əlverişli investisiya mühiti var”.