Qənirə Paşayeva ABŞ-da türkiyəli millət vəkilləri ilə görüşüb - FOTO

ABŞ-da səfərdə olan millət vəkili Qənirə Paşayeva Türkiyə Böyük Millət Məclisinin 12 millət vəkilinin və Türkiyənin Mədəniyyət nazirinin müavini Abdurrahman Arıcının təmsil olunduğu nümayəndə heyəti ilə görüşüb. Lent.az-ın məlumatına görə, görüş Hyustonda keçirilən Türkidilli Ölkələrin Böyük İpək Yolu Festivalı çərçivəsində baş tutub. Görüşdə 6 türk dövlətinin birlikdə ABŞ-da Türk xalqlarının tarixini, mədəniyyətini, adət-ənənəsini, musiqisini, mətbəxini, fəlsəfə və düşüncəsini, keçmişlə bərabər bu gününü də özündə əks etdirən böyük və yüksək səviyyəli festival keçirməsinin çox böyük əhəmiyyət daşıdığı vurğulanıb.

Türkiyənin daim Azərbaycanın yanında olacağını deyən Türkiyə Böyük Millət Məclisinin millət vəkilləri Dağlıq Qarabağ probleminin həllində Azərbaycanın haqlı mövqeyini bundan sonra da bütün platformalarda geniş şəkildə dəstəkləyəcəklərini deyiblər. Millət vəkili, Azərbaycan-Türkiyə Parlamentlərarası Dostluq qrupunun üzvü Q. Paşayeva Azərbaycan və Türkiyə bir millət iki dövlətdir fikrini qeyd edərək Azərbaycanın da daima qardaş Türkiyənin yanında olduğunu deyib.

Görüşdə qarşılıqlı maraq doğuran məsələlər ətrafında geniş fikir mübadiləsi aparılıb.