Prezident İlham Əliyev korrupsiyadan danışdı: “Cəza tədbirləri daha da sərt olacaq”

Lent.az-ın prezidentin rəsmi saytına istinadən verdiyi məlumata görə, bunu ölkə başçısı İlham Əliyev Tərtərdə yeni inşa edilən Gənclər Mərkəzinin açılışı zamanı çıxışında bildirib. Prezident qeyd edib ki, inzibati addımlar atılır, cəza tədbirləri görülür, insanlar cəzalandırılır, həbs edilir: “Ancaq ondan sonra o yerlərə gələn yeni təyin edilmiş insanlar da bəzi hallarda müəyyən müddətdən sonra eyni yolla gedirlər. Ona görə inzibati tədbirlər, əlbəttə ki, davam etdiriləcək. Cəza tədbirləri daha da sərt olacaq”.

Ölkə başçısı İlham Əliyev onu da vurğulayıb ki, bununla bərabər, korrupsiyanı mümkünsüz etmək üçün yeni üsullar da artıq işə salınır.

“Elektron hökumət, Rabitə və İnformasiya Texnologiyaları Nazirliyinin xətti ilə tətbiq edilən yeni sistemlər, qeydiyyat məsələsi, indi yeni yaradılmış “Asan” xidməti böyük dərəcədə bu korrupsiyanın qarşısını alacaq. Biz çalışırıq ki, Azərbaycanda şəffaflığı maksimum dərəcədə tətbiq edək. Bu sahədə də uğurlara nail olmuşuq” - deyə, dövlət başçısı əlavə edib.