Mədəniyyət Nazirliyi Avropa Oyunlarına hazırlığa başladı

Mədəniyyət və Turizm Nazirliyinin Türkiyənin Mədəniyyət və Turizm Nazirliyi ilə birgə əməkdaşlığı çərçivəsində respublikanın turizm potensiallı şəhər və rayonlarında fəaliyyət göstərən mehmanxana və mehmanxana tipli obyektlərdə çalışanlar üçün mütəmadi təlim-tədris kursları təşkil olunur.

Nazirlikdən Lent.az-a verilən məlumata görə, kursların uğurlu nəticələr verdiyini, həmçinin, ölkəmizdə I Avropa Oyunlarının keçiriləcəyini və xidmət səviyyəsinin günün tələbləri səviyyəsində qurulmasının vacibliyini nəzərə alaraq növbəti mərhələdə martın 3-dən 10-dək (8 günlük) Mingəçevir şəhərində xidmət sahəsi üzrə təlim-tədris kursları keçiriləcək. Kurslarda Mingəçevirdəki mehmanxanalarla yanaşı, Gəncə və Naftalan şəhərlərində fəaliyyət göstərən mehmanxana əməkdaşları da iştirak edəcək.

Təlim-tədris kurslarında əsasən 4 sahə - mehmanxana idarəçiliyi, qeyd-qəbul, xadiməçilik və masa xidməti ixtisasları üzrə dərsləri Türkiyədən dəvət olunmuş müəllimlər tədris edəcək. Mart ayının 10-da kurslarda iştirak edəcək dinləyicilərə sertifikatların verilməsi ilə təlimlər başa çatacaq. Bu istiqamətdə treninqlər regionlarda fəaliyyət göstərən mehmanxana və ona bərabər tutulan yerləşdirmə obyektlərində xidmət səviyyəsinin yüksəldilməsinə və turizmin inkişafına öz töhfəsini verəcək.