Kazan meri İçəri Şəhərdə təndir çörəyi yedi - FOTO

Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsindən Lent.az-a verilən məlumata görə, qonağın İçəri Şəhərdə gəzintisi YUNESKO-nun “Dünya İrsi Siyahısı”na daxil edilmiş, ölkəmizin ən möhtəşəm abidələrindən olan və bir neçə min illik tarixə malik Qız Qalası ilə tanışlıqla başlayıb.

Metşin Qız Qalasında yenicə başlamış bərpa və muzey konservasiyası işləri barədə məlumatlandırılıb. Sıratağlı dini-memarlıq kompleksinin ərazisindəki daş ekspozisiya qonağın marağına səbəb olub. Qonaqların gəzintisi Qoşa Qala meydanı ilə tanışlıqla davam etdirilib. Onlara meydan və burada yerləşən qədim binaların inşa tarixi barədə məlumat verilib. Metşin təzə bişmiş təndir çörəyinin dadına baxıb. İçəri Şəhərlə tanışlıq elektromobillərlə davam etdirilib.

Daha sonra qonaq İçəri Şəhər ərazisində dünya əhəmiyyətli üç abidədən biri olan Məhəmməd Məscidində olub. Ötən il burada başa çatmış muzey konservasiyası işləri barədə məlumat qonağın diqqətinə çatdırılıb. Qonaq “Kiçik Karvansara” abidəsində yerləşən Azərbaycan təsviri və dekorativ-tətbiqi incəsənət mərkəzi – “İncəsənət Bağı”ında da olub. Burada Metşin İçəri Şəhərin Fəxri Qonaqlar Kitabında ürək sözlərini qeyd edib.