TikTok yalnız müasir dövrün mövzularını deyil, eyni zamanda şəhərin və ölkənin tarixi ilə bağlı məlumatları geniş auditoriyaya çatdırmaq üçün ideal bir platformadır. Bu platformada şəhərinin və ölkəsinin əvvəlki illəri ilə bağlı xatirə tərzində məzmunlar hazırlayaraq, xüsusilə orta və yaşlı nəslin "sarı simlərinə" toxunaraq, onları keçmişdə yaşadıqları anlara qaytarmaq mümkündür. Bu yanaşma həm də şəhərin tarixi və mədəniyyəti ilə bağlı daha dərin bir əlaqə qurmağa kömək edir. Belə yaradıcılardan biri də Bakı ilə bağlı nostalji məzmunlar paylaşan Əlibaba Məmmədovdur. Onun hazırladığı videolar yalnız Bakı şəhərinin keçmişini canlandırmaqla kifayətlənmir, həm də hər bir insanın qəlbində özünəməxsus bir yer tutan o gözəl xatirələri yenidən canlandırmağa kömək edir. Əlibaba, şəhərin tarixini, mədəniyyətini və unudulmaz anlarını həyatımıza gətirən bir kontent yaradıcısıdır. Bu maraqlı yaradıcı ilə olan müsahibəmizi sizə təqdim edirik.
Bu istiqamətdə ilk addımı atarkən hansı düşüncələriniz var idi? Bakı haqqında kontent yaratmağa sizi nə motivasiya etdi və TikTok bu ideyanı reallaşdırmaqda sizə necə dəstək oldu?
Əslində əvvəlcə yaradıcı olmaq fikrim yox idi. Lakin bir gün, yaxın qohumumun xatirəsini əbədiləşdirmək məqsədilə ona dair bir video hazırladım. Bu qohumum vaxtı ilə Bakının tanınmış restoratorlarından biri olmuş və şəhərin ən hörmətli şəxslərindən sayılırdı. Onun haqqında çəkdiyim video, gözlənilmədən böyük bir rezonans doğurdu və izləyicilərdən çoxsaylı müsbət rəylər aldım. O an mən böyük bir mənəvi zövq aldım və qərar verdim ki, bu yolu davam etdirim. TikTok-da paylaşdığım həmin video, digər platformalarla müqayisədə, mənə çox daha yaxın və səmimi bir əlaqə qurma imkanı verdi. Beləliklə, bu məzmun mənim üçün bir dönüş nöqtəsi oldu.
TikTok videolarınız vasitəsilə auditoriyada hansı təsəvvürü formalaşdırmağı hədəfləyirsiniz?
Mənim məqsədim, izləyicilərimin duyğularını oyandırmaqdır. Çünki hisslər insanları birləşdirir və duyğusuz həyat yalnız bir mənzərə olur. İnsanlar bir-birinə yalnız ürəkləri ilə yaxınlaşa bilərlər və mən də bu duyğuları təbliğ etməyə çalışıram. Bakı şəhəri ilə bağlı hazırladığım məzmunlarda, mən şəhərin tarixini, mədəniyyətini, həmçinin keçmişdən gələn xatirələri izləyicilərə emosional şəkildə çatdırmaq istəyirəm. Bu, sadəcə Bakı haqqında məlumat verməkdən daha çoxdur – bu, bir hissi, bir anı, bir xatirəni bərpa etməkdir.
Sizin fikrinizcə, bu gün TikTok platforması Azərbaycanın şəhərlərinin, xüsusilə də Bakının tarix və mədəniyyətinin tanıdılması baxımından nə dərəcədə effektivdir?
TikTok, Azərbaycanın tarixini və mədəniyyətini tanıdılması baxımından çox effektiv bir platformadır. Bu platformanın dinamik və interaktiv strukturu, məzmunun daha çox insan tərəfindən izlənməsini və qəbul edilməsini təmin edir. Şəhərin və ölkənin tarixi haqqında videolar paylaşmaqla, biz yalnız yerli izləyicilərə deyil, həm də beynəlxalq auditoriyaya Bakı və Azərbaycanın zəngin mədəniyyətini tanıda bilərik. TikTok, bu mədəniyyətin daha geniş kütlələrə çatmasını və dünya səviyyəsində təqdim edilməsini mümkün edir.
Hər videonuza “Ey köhnələr,” ifadəsi ilə başlayaraq izləyicilərlə xüsusi bir yaxınlıq yaradırsınız. Bu ifadəni seçməyinizin arxasında hansı məna dayanır?
"Ey Köhnələr" ifadəsi çox xüsusi bir mənaya malikdir. Bu ifadə, daha çox 60-80-ci illərdə doğulmuş və həyatını yaşamış nəsil üçün tanışdır. Bu ifadə sadəcə Azərbaycanda deyil, dünya miqyasında da istifadə olunur. İngiltərədə "elders" olaraq tərcümə olunur və təcrübəli, həyatını yaşamış insanlar mənasına gəlir. Mənim məqsədim isə köhnə Bakı ilə bağlı xatirələri canlandırmaq və bu nəsilin dəyərlərini bu günə gətirməkdir. Onlar bizim üçün həyat məktəbi və dəyərli təcrübə mənbəyidir.
Kontentinizin izləyiciləri təqdim etdiyiniz məkanları araşdırmağa və ya ziyarət etməyə təşviq etdiyini müşahidə etmisinizmi?
Bəli, mənim videolarım izləyicilərimi yalnız şəhərimizin gözəl məkanları ilə tanış etmir, eyni zamanda onları həmin yerləri ziyarət etməyə təşviq edir. Mən uşaqlıqdan kitab oxumağı sevmişəm və hələ də həmin ənənəni davam etdirirəm. Videolarımda təqdim etdiyim məkanlarla bağlı məlumatlar da öz həyat təcrübəmdən gəlir. İnsanlara bu məkanların tarixini və mənasını izah edərkən, mənim üçün də nostalji anlar yaşanır. Ümumiyyətlə, şəhərimizin keçmişinə dair danışmaq, mənim üçün həm əyləncəli, həm də mənalı bir təcrübədir.
TikTok platformasında aktiv fəaliyyətə başladıqdan sonra bu istiqamət sizə hansı yeni imkanlar qazandırıb? Məsələn, əməkdaşlıqlar, layihələr və ya gəlir baxımından hansı dəyişikliklər baş verib?
TikTok platformasında aktiv fəaliyyətə başladıqdan sonra bu istiqamət mənə çox böyük imkanlar qazandırdı. TikTok sayəsində məşhurluq qazandım və rəqəmsal həyatda daha çox tanınmağa başladım. Həmçinin, yeni dostlar və izləyicilər əldə etdim, bu da mənim üçün çox böyük bir qürur mənbəyidir. Lakin maddi gəlir əldə etmək mənim əsas məqsədim deyil. Mənim əsas məqsədim, insanlara Bakı ilə bağlı unudulmaz anlar yaşatmaq və şəhərimizin gözəlliklərini paylaşmaqdır. TikTok sayəsində, dünyanın müxtəlif nöqtələrindən izləyicilərim oldu və onların şərhləri mənə böyük mənəvi zövq verir. Bu, mənim üçün ən böyük mükafatdır.
Şəhərin tarixi binaları və küçələri haqqında videolar hazırlayarkən məlumatları əsasən hansı mənbələrdən əldə edirsiniz?
Tarixi binalar və küçələr haqqında məlumatları həm internetdən, həm də Bakıdakı yaşlı nəsillə olan görüşlərdən alıram. Mənim üçün Bakı sakinlərinin verdiyi məlumatlar çox dəyərlidir. Bəzən yalnız onlar, mənim bilmədiyim xüsusi detallar haqqında məlumat verə bilərlər. Buna görə də çox vaxt məhz həmin şəxslərdən məlumat alıram. Mənim üçün hər bir Bakı küçəsi və bina, bir xatirədir, bir hekayədir və bu hekayələri izah etmək mənim üçün çox vacibdir.
Bakı sakini olaraq şəhərin hansı küçə və binaları sizin üçün xüsusi məna daşıyır? Bu məkanlarla şəxsi bağlılığınız nədən ibarətdir?
Bakı şəhərinin hər bir küçəsi mənim üçün çox dəyərlidir. Lakin xüsusən yaşadığım prospekt və onun ətrafı mənə daha çox əzizdir. Bu prospektdə çox gözəl xatirələrim var, həmçinin burada mənim həyatımın ən gözəl anları yaşanıb. Hər bir köhnə bina, hər bir küçə mənim üçün keçmişin və indinin qarışımıdır və mən bu anları əbədiləşdirmək istəyirəm.
TikTok platformasında ən çox populyarlıq qazanan videolarınız hansılardır və bu videolarda Bakının hansı məkanları daha çox maraq doğurur?
Ən çox izlənilən videolarım, Bakının keçmişini və köhnə Bakı insanlarını əks etdirən videolardır. Həmçinin, bu videoların ən böyük maraq doğuran hissəsi, o zamanın insanlarının həyat tərzi, onların yaşadığı duyğular və gündəlik həyatlarındakı kiçik anların təkrarıdır. İnsanlar yalnız tarix abidələri haqqında deyil, həmçinin o dövrün insanlarının ruhunu hiss etməyə çalışırlar. Mənim üçün ən böyük mükafat, izləyicilərimin gözlərində sevinc və nostalji görməkdir.
TikTok-da kontent yaradıcıları üçün uğurun açarı nədir?
Uğurun əsas açarı, cəmiyyətə maraqlı olmaqdır. Mənim auditoriyam çox qiymətli və dəyərli insanlardan ibarətdir. Onlar, cəmiyyətin əslində nə olduğunu göstərən insanlardır. Mənim üçün, izləyicilərimin mənim videolarımda keçmişin izlərini tapması və öz nostalji xatirələrini yenidən yaşaması çox vacibdir. Bu mənim üçün ən böyük uğurdur.
TikTok üçün videolar hazırlayarkən hansı çətinliklərlə qarşılaşmısınız və bu çətinliklərin öhdəsindən necə gəlmisiniz?
Ən böyük çətinliklərimdən biri, ətrafdakı səs-küy və videoların çəkilişi zamanı olan müdaxilələrdir. TikTok-da video çəkilişi edərkən çox vaxt ətrafda səs-küy olur və bu, videonun keyfiyyətini təsir edir. Amma mən çox vaxt ekspromt video çəkirəm, heç bir hazırlıq olmadan. Bu cür çəkilişlər, mənim üçün daha təbii olur.
Sonda, TikTok hesabınızla bağlı gələcək planlarınız nələrdir? Bunları oxucularımızla bölüşə bilərsinizmi?
Gələcəkdə videolarımı daha da genişləndirmək və izləyicilərimlə daha da yaxın əlaqə qurmaq istəyirəm. Mənim məqsədim, daha çox insanın ürəyinə toxunmaq və onlara öz keçmişlərini xatırlatmaqdır. TikTok, mənim üçün sadəcə bir platforma deyil, həm də mənim şəhərimi dünyaya tanıtmaq üçün bir vasitədir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
