Nazir: "6 ayda "Azərspace-1" 10 milyon dollar qazandırıb"

"Bu ilin 6 ayında "Azərspace-1" peykinin ixrac potensialından gəlirləri 10 milyon dollar olub".

APA TV-nin xəbərinə görə, rabitə və informasiya texnologiyaları naziri Əli Abbasov deyib ki, peykin ixrac potensialından gəlirləri artan xətlə inkişaf edir və Şimali Afrika, Mərkəzi Asiya və Şərqi Avropa ölkələri "Azərspace-1" peykinin imkanlarında maraqlıdır. Nazir həmçinin internetin qiyməti barədə də danışıb: "Biz o qiymətlərin aşağı salınması ilə bağlı proqram hazırlamışıq. Yəqin ki, yaxınlarda açıqlanacaq. Sonra isə böyük, 40-a yaxın provayder ordusu bundan istifadə edib internetin qiymətini aşağı sala biləcək".

Onun sözlərinə görə, bu gün Azərbaycanda İKT-dən əldə edilən gəlir 2 mlrd. dollardır və 2020-ci ilə qədər bu göstəricinin 8,5 mlrd. dollara çatacağı gözlənilir. Bu sahədə orta illik artımın 15-18% olacağı prqnozlaşdırılır. Nazir deyib ki, 2020-ci ilədək İKT sahəsinə dövlət tərəfindən 3,3 mlrd. dollar, özəl sektor tərəfindən də təxminən eyni həcmdə sərmayə yatırılacağı gözlənilir.