Azərbayanın ən riskli sığorta regionları açıqlandı - SİYAHI

Azərbaycanda sığorta riskləri baxımından ən riskli bölgələr dağlıq ərazilər, ən təhlükəsiz yerlər isə aran zonasıdır. Lent.az-ın məlumatına görə, bu barədə fins.az-a kənd təsərrüfatı risklərinin sığortası ilə yaxından məşğul olan sığorta şirkətinin biznesin inkişafı departamentinin rəhbəri Hikmət Allahverdi bildirib. Onun sözlərinə görə, kənd təsərrüfatı məhsullarının sığorta riskləri baxımından ölkə ərazisi risk zonalarına ayrılır. Məsələn, doludan sığorta üzrə bölgə və rayonlar 5 zonasına ayrılıb. Topraq sürüşməsi üzrə isə təhlükəsizlik zonalarının sayı 12-dir və s. : "Zəlzələ, vulkan püskürməsi və sel və su basqını üçün də anoloji təhlükə zonaları müəyyən edilib və sığortalanma prosesində bu bölgülərdən də istifadə olunur".

Ümumilikdə, kənd təsərrüfatı bitkiləri məhsullarının doludan sığortası üzrə ən təhlükəsiz bölgələr - Abşeron, Xızı rayonunun aran əraziləri, Ağcabədi, İmişli, Beyləqan, Yevlax, Xaçmaz rayonu və Dəvəçi, Siyəzən, Quba, Qusar rayonlarının düzən əraziləri, Biləsuvar, Neftçala, Salyan, Saatlı, Sabirabad, Hacıqabul, Ağdaş, Göyçay, Ucar, Zərdab, Kürdəmir, Ağsu, İsmayıllı rayonlarıdır. Dolu vurması baxımından ən təhlükəli bölgələr isə - Laçın, Kəlbəcər, Gədəbəy, Daşkəsən, Şəmkir və Xanlar rayonlarının dağlıq əraziləri, Şamaxının dağlıq əraziləri, Şəki- Zaqatala bölgəsinin dağlıq əraziləri, Babək, Sədərək, Ordubad, Sülfa, Şahbuz, Şərur rayonlarının dağlıq əraziləridir.

N.Allahverdinin sözlərinə görə, eyni bölgədə, məsələn Mil-Qarabağ, demək olar ki, bütün təhlükə zonalarına aid olan ərazilər var: "Eyni bölgəyə aid olan Ağcəbədi rayonu ən təhlükəsiz zonaya, Laçın isə ən təhlükəli zonaya aiddir".

Bu risklərin olması özünü sığorta haqlarının hesablanmasında da göstərir. Risklər artdıqca sığorta tarifləri də yüksəlir. Ümumiyyətlə, ən təhlükəli bölgədə bu sığorta növü üzrə tariflər təhlükəsiz bölgəyə nəzərən 50%-dək yüksək ola bilər.