67 gün davam edən yanğın söndürüldü - XƏZƏRDƏ - YENİLƏNİB

Bakıdan 80 km cənubda, Bulla dəniz qaz-kondensat yatağında kəşfiyyat qazması zamanı avqustun 17-si saat 23.30-da qəza nəticəsində yanğına məruz qalmış 90 N-li quyuda bu gün nəhayət yanğını söndürmək mümkün olub.

“Caspian Barrel” in Dövlət Neft Şirkətindəki (SOCAR) qaynaqlardan əldə etdiyi məlumata görə, 67 gün davam edən yanğını bu gün 19 radələrində söndürülüb.

SOCAR nümayəndəsinin sözlərinə görə, əvvəlcə yanan quyuya təzyiq altında qum və su şırnağı vurulub. Yanğın söndürüləndən sonra isə burada növbə çəkən gəmidən 40 tonluq quyuüstü avadanlıq quyubaşlığına tam dəqiqliklə otuzdurulub. Bu avadanlıq üçbucaq şəklində hazırlanıb. Yenidən quyuda yanğın təhlükəsinin qarşısını almaq üçün, həmçinin quyudakı anormal təzyiqi nəzaarətdə saxlamaq üçün quyu tam bağlanmayıb. Oradan nəzarət altında müəyyən qaz çıxışısaxlanılıb və o məşəldə yandırılır.

Ən əsası isə SOCAR təqribən 2 aydan artıq davam edən əməliyyat nəticəsində 5868 metr qazma dərinliyi olan kəşfiyyat quyusunu xilas edə bildi. Bundan sonra qarşıda duran vəzifə kəşfiyyat nəticəsində Bulla-dənizdə dərin qatlarda açılmış məhsuldar qatların öyrənilməsi və daha sonra onların mənimsənilməsinə başlamaqdır.