“Abşeron”dan ilk qazın 2020-2022-ci ildə hasil ediləcəyi gözlənilir

“APA-ECONOMICS”in xəbərinə görə, bu barədə Azərbaycan Dövlət Neft Şirkətinin (ARDNŞ) birinci vitse-prezidenti Xoşbəxt Yusifzadə bildirib.

Hazırda qazma qurğuları ilə bağlı problemin olduğunu deyən X.Yusifzadə bu problemlərin aradan qaldırılması üçün işlərin aparıldığını bildirib: “Qurğunun alınması və tikintisi üçün danışıqlar aparılır. Belə olan halda “Abşeron” strukturundan ilk qazı 2020-2022-ci ildə ala biləcəyik. Əgər həmin nöqtədə platforma tikilərsə, prosesi beş il daha tezləşdirə bilərik”.

X.Yusifzadə 2012-ci ilin ilk yarısında Abşeronda 4000 metr dərinliyindən 1500 metr məsafədə yan quyu qazılmasına başlanacağını da vurğulayıb.

Qeyd edək ki, ötən həftə Fransanın «Total» enerji şirkəti Xəzərin Azərbaycan sektorunda yerləşən “Abşeron” strukturunda iri qaz yatağı aşkar edildiyini açıqlayıb. «Abşeron» strukturu Bakıdan 100 km cənub-şərqdə, təqribən 6 550 metr dərinlikdə yerləşir. “Abşeron” yatağı Azərbaycan geoloqları tərəfindən ötən əsrin 60-cı illərində kəşf edilib.

«Total» şirkətinin törəmə qurumu olan «Total EP Apşeron» (40%) bu strukturun işlənməsi layihəsində ARDNŞ (40%) və «GDF SUEZ» şirkətləri (20%) ilə birgə iştirak edir.