İki xarici dövlətin sertifikatlaşdırma orqanının fəaliyyəti razılaşdırılıb

Keyfiyyəti idarəetmə sistemləri üzrə iki orqanın fəaliyyəti razılaşdırılıb. Standartlaşdırma, Metrologiya və Patent üzrə Dövlət Komitəsi tərəfindən tikinti və inşaat materiallarının, idxal olunan ərzaq məhsullarının və mebelin sertifikatlaşdırılması üzrə orqanlar akkreditasiya olunub, keyfiyyəti idarəetmə sistemləri üzrə iki orqanın fəaliyyəti razılaşdırılıb.

Dövlət Komitəsinin mətbuat xidmətindən Lent.az-a verilən məlumata görə, “AZSERTSERVİS” MMC tikinti və inşaat materiallarının sertifikatlaşdırılması üzrə orqan kimi Milli Akkreditasiya Sistemində akkreditasiya olunub.

Orqanın əsas məqsədi istehsal və idxal edilən tikinti və inşaat materiallarının sınaqlarını aparmaq və normativ sənədlərin tələblərinə uyğun olan malları sertifikatlaşdırmaqdır. “İNTERSTANDARTSERVİS” MMC mebel üzrə sertifikatlaşdırma orqanı kimi Milli Akkreditasiya Sistemində akkreditasiya olunub. Orqanın əsas məqsədi istehsal və idxal edilən mebel məhsullarının və mebel məhsulları üçün yarımfabrikat məmulatlarının sınaqlarını aparmaq və normativ sənədlərin tələblərinə uyğun olan məhsulları sertifikatlaşdırmaqdır.

“SERTİFİKAT SERVİS” MMC isə ərzaq məhsullarının sertifikatlaşdırma orqanı kimi Milli Akkreditasiya Sistemində akkreditasiya olunub. Orqanın əsas məqsədi ərzaq məhsullarının sınaqlarını aparmaq və normativ sənədlərin tələblərinə uyğun olan məhsulları sertifikatlaşdırmaqdır. Hər üç orqan öz fəaliyyətində Standartlaşdırma, Metrologiya və Patent üzrə Dövlət Komitəsinin normativ sənədlərini rəhbər tutur və onlar tərəfindən verilən uyğunluq sertifikatlarının dövlət reyestrində qeydiyyatını Dövlət Komitəsi aparır.

“Beynəlxalq (regional) və dövlətlərarası standartların, normaların, qaydaların və tövsiyələrin Azərbaycan Respublikası ərazisində tanınması və tətbiq edilməsi qaydalarının təsdiq edilməsi barədə” Azərbaycan Respublikası Prezidentinin 22 noyabr 1998-ci il tarixli Fərmanına uyğun olaraq Standartlaşdırma, Metrologiya və Patent üzrə Dövlət Komitəsinin qərarı ilə daha 2 sertifikatlaşdırma orqanının Azərbaycan Respublikası ərazisindəki fəaliyyəti razılaşdırılıb. Bunlar “Russkiy Reqistr-Azərbaycan” MMC-nin idarəetmə sistemlərinin sertifikatlaşdırma orqanı və Türk Standartları İnstitutunun Azərbaycandakı nümayəndəliyidir.