Büdcədəki sərbəst qalığın idarəetməyə verilməsi qaydaları dəyişdi

Nazirlər Kabineti 2007-ci il 6 aprel tarixli 62 nömrəli qərarı ilə təsdiq edilmiş “Büdcə ili ərzində vahid xəzinə hesabında olan vəsaitin qalığının (sərbəst qalığın) idarəetməyə verilməsi Qaydaları”nda dəyişiklik edib.

Lent.az-ın Nazirlər Kabinetinin rəsmi saytına istinadən verdiyi məlumata görə, dəyişikliyə əsasən, bundan sonra sərbəst qalıq vəsaitlərinin idarə edilməsi və ya idarəetməyə verilərək yerləşdirilməsi istiqamətlərinin müəyyən olunması Maliyyə Nazirliyinin Kollegiyası tərəfindən həyata keçiriləcək.

Bu zaman idarəetməyə veriləcək sərbəst qalıq vəsaitlərinin (investisiya portfeli) proqnozlaşdırılan həcmi, likvidlik və kredit riskləri üzrə tələblər, habelə proqnozlaşdırılan sərbəst qalıq vəsaitlərinin gəlirlilik dərəcəsi nəzərdən keçirilməlidir. Sərbəst qalıq vəsaitləri Azərbaycan Respublikasında bank lisenziyasına malik kapitallaşma və aktivlərinin məbləği səviyyəsinə görə beynəlxalq kredit reytinqini almış ən iri beş kredit təşkilatında müddətli depozitlərə və ya bu kredit təşkilatları tərəfindən buraxılmış borc kağızlarına yerləşdirilir. Sərbəst qalıq vəsaitlərinin idarə olunması məqsədi ilə bu sahəyə ixtisaslaşdırılmış yerli və xarici təsisatlar (menecerlər) cəlb edilir.