Azad İstehlakçılar Birliyi: Ölkədə təhlükəli duzlardan istifadə olunur - FOTO

Azad İstehlakçılar Birliyi ölkə ərazisində duzun yodlaşdırılması və satışı sahəsində apardığı monitorinqlər zamanı, kustar üsulla istehsal olunan və tərkibində zəhərli maddələrin olduğu duzların açıq satılması hallarını aşkarlayıb. Satılan keyfiyyətsiz duzların mənbəyini araşdırarkən məlum olub ki, bu duzlar əsasən Novxanı ərazisində yerləşən göldən toplanan duzların hesabına istehsal olunur.

Mətbuat konfransında bildirilib ki, liberal bazar iqtisadiyyatı yolunu seçmiş ölkəmizin əmtəə bazarına digər ölkədən də çoxsaylı brendlərlə duzlar daxil olur. 2001-ci ildə qəbul olunmuş “Yod çatışmamazlığı xəstəliklərinin kütləvi prafilaktikası məqsədilə duzun yodlaşdırılması haqqında” Azərbaycan Respublikasının Qanununun 8.3 maddəsində ölkədə yodsuz duzun, hətta heyvanlara verilməsi məqsədilə satışı, idxalı qadağan olunsa da yodlaşdırılmayan, təmizlənməyən, ekzotik qablara qablaşdırılmış duzların satışı davam edir. Bakı şəhərində və respublika ərazisində əfsuslar olsun ki, çörək bişirmə, pendir hazırlama sahəsində əksər hallarda yodsuz, təmizlənməyən təhlükəli duzlardan istifadə olunur. Bu qeyri-qanuni fəaliyyət aidiyyatı qurumların, bələdiyyələrin, dövlət orqanlarının gözü qarşısında baş verir. Hər gün Masazır ərazisində və respublikamızın digər yerlərində olan duz mənbələrindən qanunsuz olaraq duz toplanmaqla, müxtəlif qida istehsalı müəssisələrinə satılır.

AİB-in regional şöbələrindən verilən məlumatlara görə Masazır duz gölü yaxınlığında yerləşən duz gölündən hər gün yığılan 150 ton duz respublikanın hər yerinə, o cümlədən Şəmkir ərazisində yerləşən qeyri-qanuni sexə daşınır, qablaşdırılıb, yod vurulmadan əhaliyə satılır.

Bütün bu məsələlər barədə AİB bu işə məsul olan dövlət orqanlarına, o cümlədən İqtisadi İnkişaf Nazirliyinə 1 ay öncə məlumat versə də dövlət orqanları seyrci mövqelərini qətiyyən dəyişmək istəmir!

Azad İstehlakçılar Birliyi əhalini, bələdiyyələri, yol polisi və biznes qurumlarını bu qeyri-qanuni əməllərə son qoyulması istiqamətində konkret addımlar atmağa çağırır.