Azerfon-Vodafone “Elektron Təhsil”-ə dəstək olur - FOTO

18 iyun 2011-ci il tarixdə Azerfon-Vodafone-nun dəstəyi ilə Azərbaycan Respublikası Təhsil Nazirliyində “Elektron Təhsil” Respublika müsabiqəsinin yekunlarına dair tədbir keçirilib.

Lent.az xəbər verir ki, mərasimdə Azərbaycanın təhsil sahəsində keçirilən ən genişmiqyaslı müsabiqənin qalibləri elan edilib. Ümumiyyətlə müsabiqədə 601 layihə iştirak edib. Bunların arasından yalnız 98 nominant seçilib.

“2008-2012-ci illərdə təhsil sisteminin informasiyalaşdırılması üzrə Dövlət Proqramı” çərçivəsində həyata keçirilən bu müsabiqə Azerfon-Vodafone və bir sıra mötəbər şirkətlər tərəfindən dəstəklənir. Müsabiqənin keçirilməsində əsas məqsəd elektron tədris resurslarından və İnternet texnologiyalardan tədris prosesində istifadəni populyarlaşdırmaq, bu sahədə təhsil ictimaiyyətini məlumatlandırmaq, tədris məqsədləri üçün İnternetdən istifadənin yeni formalarını üzə çıxarmaq o cümlədən, tədris prosesində informasiya texnologiyalarından fəal istifadə edən müəllimləri həvəsləndirməkdən ibarətdir.

Azerfon-Vodafone ölkənin ən innovativ operatoru olaraq, Azərbaycanda təhsilin inkişafı üçün müasir texnologiyaların tətbiqini təşviq edir. Azerfon-Vodafone-nun 3G texnologiyasına əsaslanan bir sıra məhsul və xidmətləri artıq təhsil prosesində tətbiq edilməkdədir. Belə ki, 3G kameraları vasitəsilə valideynlər Bakı şəhəri 47 saylı orta məktəbdə ibtidai sinif şagirdlərinin davamiyyəti və dərs prosesində iştirakını canlı olaraq müşahidə edə bilərlər.