“Azərkabel” ASC satıldı

Lent.az-ın Əmlak Məsələləri Dövlət Komitəsinin rəsmi saytına istinadən verdiyi məlumata görə, müsabiqədə iştirak etmək üçün bir neçə iddiaçı tərəfindən ərizə və investisiya təklifləri təqdim olunub.

Azərbaycan Respublikasının müvafiq nazirlik və təşkilatlarından nümayəndələrin daxil olduğu Müsabiqə Komissiyasının qərarına əsasən hər iddiaçı iştirakçı statusunu qazanıb. Müsabiqə iştirakçılarının təqdim etdikləri investisiya təklifləri baxıldıqdan sonra Müsabiqə Komissiyası açıq səsvermə yolu ilə qərar qəbul edib. Səsvermənin nəticələrinə uyğun olaraq, “Azkabel” Məhdud Məsuliyyətli Cəmiyyəti “Azərkabel” ASC-nin səhmlərinin satışı üzrə investisiya müsabiqəsinin qalibi elan olunub.

Müsabiqənin şərtlərinə müvafiq olaraq, müsabiqə qalibi 300 min manat məbləğində pul vəsaitinin dövlət büdcəsinə köçürülməsini öhdəsinə götürüb. Bununla yanaşı, müsabiqənin qalibi olmuş “Azkabel” MMC təqdim etdiyi investisiya proqramına əsasən səhmdar cəmiyyətinin inkişafına yönəlmiş işlərin həyata keçirilməsinə 1 il ərzində 400 min manat məbləğində investisiya qoyuluşunun yerinə yetirəcək. Nəzərdə tutulan investisiyalar müəssisədə rezin kabel istehsalı üçün yeni avadanlıqların alınıb quraşdırılması, köhnə avadanlıqların təmiri və bərpası, habelə istehsal sahəsinin təmirinə yönəldiləcək. Müəssisədə istehsal fəaliyyəti bərpa edildikdən sonra 10 çeşiddə müxtəlifölçülü KG tipli rezin kabellərin istehsalı təmin ediləcək. İnvestisiya Proqramına əsasən, investisiya fəaliyyəti dövründə 20-ə yaxın yeni iş yerinin açılması da nəzərdə tutulub.