Azərbaycan 132 ölkə ilə ticarət edib

Ötən 10 ayda 14 milyard dollardan çox idxal-ixrac əməliyyatları aparılıb

2009-cu ilin yanvar-sentyabr aylarında Azərbaycan dünyanın 132 ölkə ilə ticarət əlaqəsi aparıb. Bu sahədə faydalı əməkdaşlıq nəticəsində 14,4 milyard dollar həcmində idxal-ixrac əməliyyatları aparılıb.

Dövlət Statistika Komitəsindən Lent.az-a bildiriblər ki, xarici ticarət dövriyyəsinin 10,0 milyard dollarını (69,6 faizini) ölkədən ixrac olunmuş mallar, 4,4 milyard dollarını (30,4 faizini) ölkəmizə idxal edilmiş məhsullar təşkil edib və 5,6 milyard dollarlıq müsbət saldo yaranıb. İxrac-idxal əməliyyatlarının 52,9 faizi Avropa, 32,4 faizi Asiya, 13,5 faizi Amerika, 1,1 faizi Afrika qitəsi ölkələrinin, 0,1 faizi isə Okeaniyanın payına düşür. Xarici ticarət əməliyyatlarının 18,0 faizi İtaliya, 9,4 faizi ABŞ, 9,4 faizi Rusiya, 6,9 faizi Fransa, 5,7 faizi İsrail, 5,2 faizi Türkiyə, 3,8 faizi Tayvan, 3,5 faizi Almaniya, 3,1 faizi Kanada, 2,9 faizi Ukrayna, 2,8 faizi Böyük Britaniya, 2,8 faizi Çin, qalan 26,5 faizi isə digər dövlətlərlə aparılıb.

Elxan SALAHOV