Bəzi sənaye malları bahalaşıb

Avqust ayında Azərbaycanda sənaye məhsullarının istehsalçı qiymətləri əvvəlki aya nisbətən 0,1 faiz bahalaşıb.

Dövlət Statistika Komitəsindən Lent.az-a bildiriblər ki, ötən ay ərzində maşın və avadanlıqlar istisna olmaqla emal sənayesində istehsalçı qiymətləri 17,2 faiz, ağacı emalı, ağacdan məmulatların və tıxacın istehsalı üzrə 3,8 faiz, geyim istehsalı üzrə 2,7 faiz artıb. Həmçinin qida məhsullarının istehsalı üzrə 1,7 faiz, rezin və plastmas məmulatların istehsalı üzrə 1,5 faiz, koks və təmizlənmiş neft məhsullarının istehsalı üzrə 1,3 faiz, içki istehsalı üzrə 1,1 faiz, mebellərin istehsalı üzrə 1,2 faiz, toxuculuq sənayesi üzrə 0,4 faiz, kimya sənayesi və tütün məmulatlarının istehsalı üzrə 0,3 faiz, digər qeyri-metal mineral məhsulların istehsalı üzrə 0,2 faiz bahalaşma qeydə alınıb.

Komitənin hesablamalarına görə, avqust ayında bəzi sənaye mallarının qiymətində ucuzlaşma da baş verib. Belə ki, kağız və karton istehsalı üzrə 1,0 faiz, poliqrafiya fəaliyyəti və yazılmış məmulatların daşıyıcılara çoxaldılması üzrə 0,5 faiz, dəri və dəridən məmulatların, ayaqqabıların istehsalı üzrə 0,1 faiz ucuzlaşıb. Bundan başqa, ötən ay mədənçıxarma sənayesində xam neft və təbii qaz hasilatı üzrə qiymətlər 0,6 faiz, mədənçıxarma sənayesinin digər sahələri üzrə isə 2,1 faiz azalıb.

Elxan SALAHOV