“Statoyl-Azərbaycan”ın rəhbərliyi Rövnəq Abdullayevlə görüşüb

Bu gün ARDNŞ-in baş ofisində şirkətin prezidenti Rövnəq Abdullayev “Statoyl-Azərbaycan” Şirkətinin rəhbərliyini qəbul edib.

Lent.az-ın ARDNŞ-in rəsmi saytına istinadən verdiyi məlumata görə, “Statoyl-Azərbaycan” şirkətinin prezidenti Kristian Hausken bildirib ki, Azərbaycandakı səlahiyyət müddəti başa çatmaq üzrədir.

Kristian Hausken “Statoyl-Azərbaycan” Şirkətinə 2007-ci ilin əvvəllərindən rəhbərlik etdiyini və bu müddətdə ARDNŞ ilə hərtərəfli və etibarlı tərəfdaşlıq münasibətlərinin inkişaf edib dərinləşməsi üçün əlindən gələni əsirgəmədiyini söyləyib.

Rövnəq Abdullayev “Statoyl-Azərbaycan” Şirkəti ilə istər “Azəri-Çıraq-Günəşli”, istərsə də “Şahdəniz” layihələri üzrə səmərəli əməkdaşlıq münasibətlərinin qurulduğunu bildirib və bu münasibətlərin hazırkı mərhələyə çatmasında Kristian Hauskenin xidmətlərini yüksək qiymətləndirib.

Sonra “Statoyl-Azərbaycan” Şirkətinin prezidenti Kristian Hausken öz sələfini, görüşdə iştirak edən Lars Sorenseni ARDNŞ rəhbərliyinə təqdim edib, onun istər mühəndis, istərsə də menecer kimi böyük təcrübəyə malik olduğunu dilə gətirib. “Statoyl-Azərbaycan” Şirkətinin yeni təyin olunmuş prezidenti Lars Sorensen indiyə qədərki əmək fəaliyyəti haqda məlumat verib və Azərbaycana təyin olunmasından şad olduğunu söyləyib.

Görüşün sonunda Rövnəq Abdullayev Kristian Hauskenə ARDNŞ-in xatirə hədiyyələrini təqdim edib.