Azərbaycan Suriyaya qaz satacaq

İki ölkənin hökumətləri bu barədə razılıq əldə edib

Bu gün Bakıda Suriya və Azərbaycan hökumətləri arasında iqtisadi, elmi, texniki və mədəni sahələrdə əməkdaşlıq protokolu imzalanıb. Niyyət protokolu iki ölkə arasında 19 müxtəlif sahələr üzrə əməkdaşlığın genişləndirilməsini nəzərdə tutur.

Lent.az-ın məlumatına görə, imzalanma mərasimindən sonra kənd təsərrüfatı naziri, hökumətlərarası birgə komissiyanın üzvü İsmət Abbasov bildirib ki, niyyət protokolu iqtisadi ticarət, təhsil, səhiyyə, rabitə və informasiya texnologiyaları, mədəniyyət, kənd təsərrüfatı sahələrini əhatə edir.

Protokol çərçivəsində əldə edilmiş digər razılaşmaya əsasən, Azərbaycan gələn ildən Suriyaya təbii qaz ixrac edəcək. İsmət Abbasov bildirib ki, 20 illik çərçivə razılaşması 1-1,5 milyard kubmetr qaz alqı-satqısını nəzərdə tutur. Suriyaya satılacaq qazın qiyməti isə neftin qiymət normativləri əsasında müəyyən ediləcək.

Artıq bununla bağlı Suriya hökuməti ilə ARDNŞ arasında razılaşma da əldə olunub. Razılaşmaya əsasən, Suriyaya qaz ixracı gələn ilin ortalarından başlana bilər.

Elxan SALAHOV