Azərbaycana yeni cins inəklər gətirilib

Avstriyadan gətirilmiş 163 baş cins düyələr 50 faiz qiymətinə fermerlərə satılır

Kənd Təsərrüfatı Nazirliyi yanında “Aqrolizinq” ASC Avstriyadan yeni cins inəklər gətirilib. Dövlət büdcəsindən ayrılan vəsaitlər hesabına alınan cins inəklərin ilk partiyasının fermerlərə satışına başlayıb.

Kənd Təsərrüfatı Nazirliyindən Lent.az-a bildiriblər ki, bu il ilk mərhələ 163 baş “Şviss” və “Sim-mentol” cins düyələr fermerlərə lizinq yolu ilə satılır. Bu iribuynuzlu heyvanlar digər cinslərlə müqayisədə daha çox süd verir. Heyvanlar əvvəlcə onun gətirildiyi ölkədə, daha sonra Azərbaycanda 20 gün karantin dövrü keçdikdən sonra satışa çıxarılır. Artıq ölkənin müxtəlif bölgələrindən bu heyvanların alınmasına dair sənədlər təqdim olunub.

Xatırladaq ki, cins heyvanların satış qiyməti onların diri çəkisinə əsasən təyin olunur. Kənd Təsərrüfatı Nazirliyində deyirlər ki, 1 inəyin qiyməti təxminən 3500-3800 manatdır. Heyvanların qiymətinin 50 faizi dövlət tərəfindən fermerlərə güzəşt olunur. Digər 50 faiz vəsaitin yarısını fermerlər bəri başdan, qalan hissəsini isə 3 il müddətində hissə-hissə ödəməlidir.

Elxan SALAHOV