Nəqliyyat məsələləri Avropada çözüləcək

Azərbaycan nəqliyyatçıları Vyana və Brüsseldə ATƏT və Avropa İttifaqının nümayəndələri ilə bir araya gələcək

Gələn ay Avropanın iki böyük şəhərində beynəlxalq nəqliyyat məsələlərinə dair
Nəqliyyat məsələlərinə dair iki konfrans keçiriləcək. Bu tədbirlərdən biri fevralın 1-2-də Vyanada təşkil olunacaq.

Nəqliyyat Nazirliyindən Lent.az-a bildiriblər ki, müzakirələr ATƏT-in 18-ci İqtisadi və Ətraf Mühit Forumunun və Avropa İttifaqı ilə Azərbaycan arasında Enerji, Nəqliyyat və Ətraf Mühit üzrə Alt Komitənin 5-ci iclası çərçivəsində aparılacaq. Konfransın mövzusu sərhəd keçidlərində səmərəli idarəçiliyin təşviq edilməsi, quru nəqliyyatında təhlükəsizliyin artırılması və ATƏT regionunda avtomobil və dəmir yolu vasitəsi ilə beynəlxalq daşımaların asanlaşdırılmasıdır. Tədbirdə region ölkələrinin nəqliyyat və tranzit siyasəti ilə bağlı məsələlərin müzakirə ediləcəyi gözlənilir.

İkinci tədbir isə fevralın 4-də Brüsseldə keçiriləcək. Avropa İttifaqı ilə Azərbaycan arasında Enerji, Nəqliyyat və Ətraf mühit üzrə Alt Komitənin 5-ci iclasının gündəliyinə bir neçə vacib məsələlər daxil edilib. Tədbirdə Azərbaycanla Avropa İttifaqı arasında Avropa Qonşuluq Siyasəti çərçivəsində qəbul edilmiş Fəaliyyət Planında nəzərdə tutulmuş tədbirlərə dair görülmüş işlərin, Avropa Qonşuluq və Tərəfdaşlıq Aləti çərçivəsində qeyd olunan məsələlərin müzakirə ediləcəyi gözlənilir.

Xatırladaq ki, hər iki konfransda Nəqliyyat Nazirliyinin nümayəndələri də iştirak edəcək.

Elxan SALAHOV