Sumqayıt nümayəndə heyətinin Aktau şəhərinə səfəri uğurla başa çatıb
29 dekabr 2009 20:00 (UTC +04:00)

Sumqayıt nümayəndə heyətinin Aktau şəhərinə səfəri uğurla başa çatıb

Sumqayıt şəhərinin incəsənət ustalarından ibarət nümayəndə heyəti cari Qazaxıstan Respublikasının Aktau şəhərində səfərdə olub. Lent.az-ın məlumatına görə, Sumqayıtın estrada müğənniləri, muğam ifaçıları və rəqs qrupu Aktau şəhərinin mərkəzi konsert salonunda yerli musiqiçilərlə birlikdə konsert proqramında iştirak ediblər. Qazaxıstan Respublikasının Müstəqillik Günü və Dünya Azərbaycanlılarının Həmrəyliyi Günü münasibətilə ilə təşkil olunmuş bu tədbir Azərbaycanın Aktau şəhərindəki Baş Konsulluğunun təşəbbüsü ilə baş tutub. Konsert proqramında Anar Quliyev, Sevda Kazımova və Aygün İsmayılova muğam və xalq mahnılarımızı, rəqs ansamblının üzvləri isə “Yallı”, “Vağzalı”, “İgidlər”, “Naz eləmə” və digər rəqslərimizi ifa ediblər. Qeyd edək ki, bu həm də Sumqayıt şəhəri ilə Aktau şəhəri arasında yaradılmış əməkdaşlıq çərçivəsində ilk mədəniyyət tədbiri olub.

Xatırladaq ki, 3 oktyabr 2009-cu il tarixdə Azərbaycan Respublikasının Prezidenti cənab İlham Əliyevin və Qazaxıstan Respublikasının Prezidenti cənab Nursultan Nazarbayevin iştirakı ilə Bakı şəhərində keçirilən Azərbaycan-Qazaxıstan sənədlərinin imzalanması mərasimində Sumqayıt və Aktau şəhərləri arasında qardaşlaşmış şəhər münasibətlərinin yaradılması haqqında Birgə Bəyannamə” imzalanıb. Birgə Bəyannamə tərəflər arasında təhsil, elm, səhiyyə, idman və mədəniyyət də daxil olmaq geniş spektr üzrə əməkdaşlıq əlaqələrinin inkişafını nəzərdə tutur.

Lalə Yusifqızı
# 553

Oxşar yazılar