Bu il 31 yeni məktəb tikilib

25 orta və 1 peşə məktəbinin, 1 məktəb üçün 840 şagird yerlik əlavə korpusun tikintisi gələn il başa çatacaq

2009-cu ildə Azərbaycanda 31 yeni məktəb binası tikilib. İl ərzində tikintisi başa çatdırılmış və istifadəyə verilmiş məktəblərin əksəriyyəti bölgələrin payına düşür.

Təhsil Nazirliyindən Lent.az-a bildiriblər ki, 2009-cu ildə 11 min şagird yerlik 28 yeni məktəbin, 3 mövcud məktəb üçün 1420 şagird yerlik 71 sinif otağının, 2 internat məktəbinin, 2 uşaq bağçasının, 11 ümumtəhsil məktəbinin əsaslı təmiri başa çatdırılıb. Həmin məktəblər ən müasir texniki avadanlıqla təchiz edilib.

Bundan başqa, ölkə başçısının 23 iyun 2009-cu il tarixli “Qəza vəziyyətində olan ümumtəhsil məktəb binalarının yenidən qurulması haqqında” sərəncamı çərçivəsində 800 yerlik 3 yeni məktəbin, 440 şagird yerlik 22 sinif otağının tikintisi və 4 məktəbin əsaslı təmiri yekunlaşdırılıb. Bu il həmçinin 1 peşə liseyin və 8 körpələr evinin təmiri başa çatdırılıb.

Nazirlikdə bildirirlər ki, prezidentin tapşırıqlarına əsasən, bu il 25 orta və 1 peşə məktəbinin, 1 məktəb üçün 840 şagird yerlik əlavə korpusun tikintisi, 4 orta məktəbin və 1 peşə liseyinin əsaslı təmirinə başlanılıb. Həmin təhsil ocaqlarının hamısı növbəti dərs ilində istifadəyə veriləcək.

Təhsil Nazirliyində 2009-cu ili məktəblərin istiliklə təminatı baxımından da uğurlu hesab edirlər. Nazirlikdə bildirirlər ki, bu il ümumtəhsil müəssisələrinin istilik təminatı əvvəlki illərlə müqayisədə xeyli yaxşılaşıb. Belə ki, bu il 87 məktəbdə qazlaşdırma işləri aparılıb. Bakı və ətraf qəsəbələrdəki bütün məktəblərdə modul qazanxana tikilib və ya ümumi istilik şəbəkəsinə qoşulub.

Elxan SALAHOV